ތިބާއަށް އުފަންވާ ހުރިހާ ދަރިންނަކީ ބަލިތަކުން ދިފާއުވުމަށް ބޭނުންވާ ވެކްސިން ދީ، ބަލިތަކުން ދުރުކުރެވިފައިވާ ބައެއްކަމުގައި ކަށަވަރުކުރުމަށް ހުރިހާ މަންމައިންނަށް ކަރީނާ ކަޕޫރު ގޮވާލައިފިއެވެ.
ބޮލީވުޑްގެ ކުޅަދާނަ ބަތޮލާ އަދި ކުޑަކުދިންނާ ބެހޭ އދގެ އިދާރާގެ ސެލެބްރިޓީ އެޑްވޮކޭޓް ކަރީނާ ވަނީ، މަޔަކަށް ވުމުން އޭނާއަށް އެންމެ ފުރަތަމަވެސް ކުރެވުނު އިހުސާސްތަކާ ހިތުގައި އުފެދުނު ސުވާލުތައް އަދުގެ ޒުވާން މަންމައިންނާ ހިއްސާކޮށްފައެވެ.
ކަރީނާ ބުނިގޮތުގައި ތައިމޫރު އުފަންވުމާއެކުވެސް ޑޮކްޓަރުން ކުރެން އެންމެ ފުރަތަމަވެސް އަހާލެވުނީ އެ ދަރިފުޅު ނިއުމޯނިއާ ފަދަ ބަލިތަކުން ދިފާއުކޮށް ސަލާމަތްކުރާނީ ކިހިނެއްތޯއެވެ. އަދި އެނޫންވެސް އެތައް ސަތޭކަ ބައްޔަކުން އެ ލޯބި ދަރިފުޅު ސަލާމަތްކުރާނީ ކިހިނަކުންތޯއެވެ. ޖަވާބުގައި ޑޮކްޓަރު ދިނީ ވެކްސިން ތާވަލެއް ކަމަށާ، އެދުވަހުން ފެށިގެން އަދާ ޖެހެންދެންވެސް އެ ތާވަލާ އެއްގޮތަށް ތައިމޫރަށް ވެކްސިން ދެމުން އަންނަ ކަމަށް އުމުރުން 38 އަހަރުގެ ކަރީނާ ވަނީ ކިއާދީފައެވެ.
ތަފާތު އެކި ގަބޫލުކުރުންތަކާއެކު، އަލަށް އުފަންވާ ކުދިންނަށާ، ވެކްސިން ޖަހާ ދޮށީ އުމުރުގެ ކުދިންނަށް ވެކްސިން ނުދީ އުޅޭ މީހުންގެ އަދަދު، ދުނިޔޭގެ އެކި ހިސާބުތަކުގައި ދަނީ ކަންބޮޑުވާ ދަރަޖައަށް އިތުރުވަމުންނެވެ.
ކަރީނާ މިހާރު ދަނީ އޭނާގެ އެންމެ ފަހުގެ ފިލްމް "ގުޑް ނިއުސް"ގެ މަސައްކަތްތައް ކުރަމުންނެވެ. މި ފިލްމު ރިލީޒްކުރާނެ ކަމަށް ބެލެވެނީ މިއަހަރުގެ ފަހުކޮޅުއެވެ.
