ދެކުނު ކޮރެޔާއިން އުފަންވެގެން އައި މުނިފޫހިފިލުވުމުގެ ޕްލެޓްފޯމުކަމަށްވާ ކޭ-ޕޮޕް ނުވަތަ ކޮރީއަން ޕޮޕްކަލްޗާގެ އާދަތަކުގެ ސަބަބުން ފިރިހެން ކުދިން އަންހެން ވަމުން އަންނަ މައްސަލައަށް ހައްލު ހޯދުމުގެ ގޮތުން ޗައިނާއިން ބޫޓްކޭމްޕެއް ފަށައިފިއެވެ.
މި ބޫޓްކޭމްޕަކީ ފިރިހެން ކުދިންގެ ފިރިހެންވަންތަކަން ކޭޕޮޕަށް ގެއްލުވާލިޔަ ނުދިނުމުގެ މަގުސަދުގައި ޗައިނާއިން ހިންގާ ބޫޓްކޭމްޕެކެވެ.
"ރިއަލް މޭން ޓްރެއިނިންގް ކުލަބު"ގެ ނަމުގައި، ކުޑަ ފިރިހެން ކުދިންނަށް ހާއްސަކޮށްގެން ބޫޓްކޭމްޕް ހިންގުމުގައި އިސްކޮށް އުޅެނީ، ޗައިނާގެ ސްކޫލްތަކުގައި ކިޔަވާދޭން އުޅުނު ޓީޗަރެއް ކަމަށްވާ ޓޭންގް ހަޔާންއެވެ.
ކޭ-ޕޮޕް ފެޝަނަށް ގިނަ ފިރިހެން ކުދިން ލޯބިޖެހެމުންދާއިރު އެއީ ޗައިނާއަށް އޮތް ބޮޑު މުސީބާތެއްގެ ގޮތުގައި ހަޔާންވަނީ ސިފަކޮށްފައެވެ. ބޮލުގައި ކުލަޖެއްސުމާ، މޭކަޕް ކުރުމާ، ކަންފަތުގައި އެއްޗިހި ލުމުގެ އިތުރުން ލާއުޅޭ އަންނައުނުތަކުގެ ފެޝަނަށް ކޭޕޮޕްގެ ނަމުގައި ކުދިންގެ ހިތް ލަންބުވަމުން ދިއުމަކީ ޒުވާން ޖީލުގެ ހަލާކުގައި ހަޔާން ބުނެއެވެ.
ހަޔާން ވަނީ ފިރިހެން ވަން ޒުވާން ޖީލެއް ޗައިނާއަށް ގެނެސްދިނުމަށްޓަކައި، އެމެރިކާއަށް ގޮސް، އެމެރިކާގެ ފުޓުބޯޅަ ކުލަބުތަކުން ކުޅުންތެރިން ތަމްރީނު ކުރާ ގޮތް ގާތުން ބަލާ، ތަޖުރިބާ ހޯދާފައެވެ.
ކޭޕޮޕް ފެޝަނަކީ ފުރާވަރު އުމުރުގެ ދިވެހި ފިރިހެން ކުދިންގެ މެދުގައިވެސް ސަމާލުކަން ހޯދަމުން އަންނަ، އެހެން ނަމަވެސް ދީނީ ހަމަތަކާ ދިވެހި އާދަކާދައިގެ ނަޒަރުން ބަލާއިރު ކަންބޮޑުވާންޖެހޭ ފެޝަން ޓްރަންޑަކަށް އޮތީ ވެފައެވެ.
