އޭޝިއާ ގައުމުތަކުގައި 3 ވަނައަށް އެންމެ މަޝްހޫރު ޑީޖޭގެ ގޮތުގައި ލިސްޓުކޮށްފައިވާ އޮސްޓްރޭލިއާގެ ޑީޖޭ އެޑަމް ސްކައި މަރުވެއްޖެއެވެ.
އުމުރުން 42 އަހަރުގެ ޑީޖޭ ސްކައި މަރުވީ ރައްޓެއްސަކާއެކު އިންޑޮނޭޝިއާގެ ބާލީގައި ޗުއްޓީ ހޭދަކުރަމުންދަނިކޮށް ހިނގި ހާދިސާއެއްގައެވެ.
މައުލުމާތު ލިބޭ ގޮތުގައި ޑީޖޭ އެޑަމް މަރުވީ އެމީހުންނަށް ހާއްސަކޮށްފައިވާ ޕްރައިވެޓް ޓަރަހަކުން އެތައް މީޓަރެއް ތިރިއަށް ޑީޖޭ އެޑަމްގެ ރަހުމަތްތެރިޔާ ވެއްޓި ޒަހަމްވުމުން އޭނާ ސަލާމަތް ކުރަން އުޅުމުގެ ތެރޭގައެވެ. އެގޮތުން ޒަހަމްވި ރަހުމަތްތެރިޔާއާއި ހަމައަށް ދިއުމަށް ޑީޖޭ އެޑަމްވަނީ އޭނާގެ ހަށިގަނޑުގައި ހުރި ބާރެއްލައިގެން ބިއްލޫރުޖެހި ދޮރެއް ފަޅާލާފައި ކަމަށާ، ޑީޖޭ އެޑަމް މަރުވީ ބިއްލޫރިގަނޑު ފަޅާލުމުން ހަށިގަނޑަށް ލިބުނު ފުން ޒަހަމްތަކާ، އެ ޒަހަމްތަކުގެ ސަބަބުން ގިނައަދަދަށް ލޭ ބޭރުވެގެން ކަމަށް މީޑިއާ ރިޕޯޓްތައް ބުނެއެވެ.
ޑީޖޭ ސްކައިއަކީ ޑޭވިޑް ގެޓާ ފަދަ އާޓިސްޓުންގެ ތަރުހީބުވެސް ހޯދާފައިވާ ފަންނުވެރިއެކެވެ. ޑީކޭ ސްކައިގެ އަސްލު ނަމަކީ އެޑަމް ނީޓްއެވެ.
