ހީނާ ހާން ކޯމޮލިކާގެ ރޯލުން ޝޯ ދޫކޮށްލާ ޚަބަރާއެކު މީޑިއާގެ ރާޑަރަށް އަރާފައިވާ "ކަސޯޓީ ޒިންދަކީ ކޭ"ގެ ރީބޫޓަށް "ބަޖާޖެއް" ހޯދުމުގެ މަސައްކަތް، އެކްތާ ކަޕޫރު ފަށައިފިއެވެ.
ކަސޯޓީގެ އޮރިޖިނަލް ސީރީޒްގައި ބަޖާޖުގެ ރޯލުން ފެނިގެންދިޔަ ރޯނިތު ރޯއަށް ވަދާއީ ސަލާމް ކުރަމުން އިންސްޓަގްރާމްގައި ހިއްސާކުރި ޕޯސްޓެއްގައި އެކްތާވަނީ އާ ބަޖާޖު ހޯދަން އިއުލާންކޮށްފައެވެ. މި އިއުލާނާއެކު އެކްތާ ވަނީ، ކަސޯޓީގެ މަޝްހޫރު ބެކް މިއުޒިކަށް ޝްވެތާ ތްރިވާނީއާއި ރޯނިތު ރޯނި ނަށަމުންދާ މަންޒަރު ފެންނަ ވީޑިއޯވެސް ހިމަނާފައެވެ.
އެކްތާގެ ޕޯސްޓު އާންމުކުރުމާއެކު މަޝްހޫރު ތަރިންވެސް ހިމެނޭ ގޮތަށް އެކްތާގެ ގިނަ ފޭނުންތަކެއް ދަނީ ސޯޝަލް މީޑިއާގައި ހޫނު ބަހުސެއް ކުރަމުންނެވެ. ޝޯ އިން ވަކިވާ ހީނާވެސް ވަނީ އާ ބަޖާޖުއާއި ދިމާ ނުވާނެތީ އެކަމާ ހިތާމަ ކުރާ ކަމަށް ބުނެފައެވެ.
ކަންމިހެން އޮތްއިރު، އާ ބަޖާޖަކީ، ރޯނިތު ރޯއީއާއި އެއް ހަމައެއްގައި ފައި ހަމަކޮށްލެވިދާނެ މީހެއް ކަމާ މެދު ގިނަ ބަޔަކު ދަނީ ސުވާލު އުފައްދަމުންނެވެ. ބަޖާޖުގެ ގޮތުގައި ފެނިގެންދިޔަ ރޯނިތު ރޯއަކީ ދިވެހިންގެ މެދުގައިވެސް ބޮޑު މަގުބޫލުކަމެއް ހޯދި ބަތޮލެކެވެ.
