އިންޑިއާގައި މިހާރު ކުރިއަށްދާ އާންމު އިންތިހާބުގައި ވޯޓު ދީފައިވާކަމާ މެދު ސުވާލުތަކެއް އުފައްދާ، ބޮލީވުޑްގެ ބަތޮލް އަކްޝޭ ކުމާރާ ބެހޭ ގޮތުން ދައްކަމުންދާ ތަފާތު ވާހަކަތަކަށް އޭނާ ވަރުގަދަ ރައްދެއް ދީފިއެވެ.
އާންމު އިންތިހާބުގައި އަކްޝޭ ވޯޓު ދިން މަންޒަރު ނުފެންނަކަން ފާހަގަކޮށް، އޭނާގެ ރަށްވެހިކަމާމެދު ގިނަ ބަޔަކު ސުވާލު އުފައްދަމުންދާއިރު، އަކްޝޭ ބުނީ އެއީ އޭނާގެ ޒާތީ ކަމެއް ކަމަށާ އެކަމުގެ ސަބަބުން އެހެން މީހަކަށް ލިބޭނެ ގެއްލުމެއް ނޯންނާނެ ކަމަށެވެ. އަދި އެކަމަކީ އޭނާގެ މަސްލަހަތު އޮތް ކަމެއް ކަމަށާ އެކަމުގެ ތެރެއަށް އެހެންމީހުން ވަނުމުގެ ބޭނުމެއް ނެތް ކަމަށްވެސް އަކްޝޭ ވަނީ ބުނެފައެވެ.
އުމުރުން 51 އަހަރުގެ އަކްޝޭ ކުރި ޓްވީޓެއްގައި ބުނެފައިވަނީ އިންތިހާބުގައި އޭނާ ވޯޓުނުލައިގެން އެހާ ނޭދެވޭ މޭރުމަކުން އޭނާއާއި މެދު ވާހަކަ ދައްކަން ވީ އެއްވެސް ސަބަބެއް ނުވިސްނުނު ކަމަށާ، އޭނާ އަތުގައި ކެނެޑާގެ ޕާސްޕޯޓެއް އޮންނަ ވާހަކައަކީ ދުވަހަކުވެސް އޭނާ ސިއްރުކޮށްގެން އުޅުނު ވާހަކައެއް ނޫންކަމަށެވެ.
ފާއިތުވީ 7 އަހަރު ދުވަހުގެ ތެރޭގައިވެސް ކެނެޑާއަށް ގޮސްފައި ނުވާކަމަށާ، މަސައްކަތްކުރަނީ އިންޑިއާގައި ކަމަށާ، ދައްކަންޖެހޭ ހުރިހާ ޓެކުހެއްވެސް ބަރާބަރަށް ދައްކާ ޚަލާސް ކުރަމުންދާ ކަމަށްވެސް އަކްޝޭ ވަނީ ބުނެފައެވެ.
އިންޑިއާ ދެކެ އޭނާގެ ހިތުގައި އޮތް ހާއްސަ ގަދަރާ ލޯބި ސާބިތުކޮށްދިނުމަށް މިއިން އެއްވެސް ދުވަހަކު މަސައްކަތެއް ކުރަންޖެހިފައި ނުވާއިރު، މިހާރު އެފަދަ ގޮތަކަށް އޭނާގެ ރަށްވެހިކަމާ މެދު ވާހަކަ ދެކެވެމުންދާތީ އެކަމާ ހިތާމަ ކުރާ ކަމަށްވެސް އަކްޝޭ ވަނީ ބުނެފައެވެ.
އަކްޝޭ އަކީ އިންޑިއާގައި މިހާރު ކުރިއަށްދާ އާންމު އިންތިހާބުގައި ބޮޑުވަޒީރުކަމުގެ ދެވަނަ ދައުރެއް ކަށަވަރުކުރައްވަން މަސައްކަތްޕުޅުކުރައްވަމުން ގެންދަވާ ނަރޭންދްރާ މޯދީއާއި ގާތް ގުޅުންތަކެއް ބާއްވަމުންދާ ބަތޮލެކެވެ. އެގޮތުން އަކްޝޭ ވަނީ ދާދިފަހުން މޯދީއާއެކު ސުވާލާ ޖަވާބުގެ ހާއްސަ ޕްރޮގްރާމެއްވެސް ހޮސްޓްކޮށްފައެވެ.
