ބިލްބޯޑް މިއުޒިކް އެވޯޑް 2019ގެ ގިނަ މަގާމުތަކެއް ކަށަވަރުކޮށް، އަހަރުގެ އެންމެ ކާމިޔާބު ލަވަކިއުންތެރިޔާގެ ރެކޯޑް، ކެނެޑާގެ މަޝްހޫރުގެ ރެޕާ އަދި އެކްޓާ އޯބްރޭ ޑްރޭކް މިލްކުކޮށްފިއެވެ.
އުމުރުން 32 އަހަރުގެ ޑްރޭކްވަނީ ބިލްބޯޑް މިއުޒިކް ޓޮޕް އާޓިސްޓް އެވޯޑްވެސް ކަށަވަރުކޮށްފައެވެ. އޭނާ މި އެވޯޑް ގެންދިޔައީ ކާޑިބީއާ އާރިއާނާ ގްރާންޑޭ އަދި ޕޯސްޓް މަލޯން ފަދަ ލަވަކިއުންތެރިންނާ ވާދަކޮށްގެންނެވެ.
އެޑް ޝީރަންއާއި ވާދަކޮށް ޓޮޕް މޭލް އާޓިސްޓްގެ އެވޯޑް، އާރިއާނާ ގްރާންޑޭއާއި ޕޯސްޓް މަލޯންއާއި ވާދަކޮށް ބިލްބޯޑް 200 އާޓިސްޓްގެ އެވޯޑް އަދި ކާޑިބީއާއި ވާދަކޮށް ބިލްބޯޑް ހޮޓް 100 އާޓިސްޓްގެ އެވޯޑްވެސް ގެންދިޔައީ ޑްރޭކްއެވެ.
މަޝްހޫރު ގިނަ ފަންނުވެރިންތަކަކާ ވާދަކޮށްގެން ސްޓޮޕް ސްޓްރީމިންގް އާޓިސްޓްއާއި، ޓޮޕް ސޯންގް ސޭލްސް އާޓިސްޓް އަދި ޓޮޕް ރޭޑިއޯ ސޯންގްސް އާޓިސްޓްގެ އެވޯޑްވެސް އުފުލާލާފައިވަނީ ޑްރޭކްއެވެ.
ބިލްބޯޑް އެވޯޑް ހަފުލާގައި ޑްރޭކަށް ލިބުނު އިތުރު ކާމިޔާބީތަކުގެ ތެރޭގައި ޓޮޕް ރެޕް އާޓިސްޓް އަދި ޓޮޕް ރެޕް މޭލް އާޓިސްޓްގެ ޓައިޓްލް ފާހަގަކޮށްލެވެއެވެ. މީގެ އިތުރުން ޓޮޕް ބިލްބޯޑް 200 އަލްބަމްގެ ޓައިޓްލްވެސް ލިބިފައިވަނީ ޑްރޭކްގެ "ސްކޯޕިއަން"އަށެވެ. ޓޮޕް ރެޕް އަލްބަމްގެ އެވޯޑްވެސް ގެންދިޔައީ ހަމަ މި އަލްބަމެވެ.
ބިލްބޯޑް މިއުޒިކް އެވޯޑަކީ މިއުޒިކް ކުންފުނި އަދި މަގުބޫލު މިއުޒިކް ޗާޓް "ބިލްބޯޑް" އިން 1990 އަހަރު ދޭން ފެށި އެވޯޑެކެވެ. 2006 ވަނަ އަހަރު މި އެވޯޑް ދިނުން މެދުކަނޑާލުމަށްފަހު އެވޯޑް އަލުން ދޭން ފެށީ 2011 ވަނަ އަހަރުއެވެ.
