މަޝްހޫރު "ސްޓާ ވޯޒް" ފިލްމް ފްރެންޗައިޒްގައި ވޫކީ ވޯރިއާ ޗުބާކާގެ ރޯލުން ފެނިގެންދިޔަ އެކްޓަރު ޕީޓާ މޭހިއު މަރުވެއްޖެއެވެ.
އުމުރުން 74 އަހަރުގައި މޭހިއު މަރުވީ މިދިޔަ މަހުގެ 30 ވަނަ ދުވަހު ކަން އޭނާގެ އާއިލާއިން މިހާރު ވަނީ މީޑިއާއާށް ކަށަވަރުކޮށްދީފައެވެ.
މޭހިއު މަރުވީ ޓެކްސަސްގައި ހުންނަ އޭނާގެ ގޭގައެވެ.
މޭހިއުގެ އާއިލާއިން ބުނީ އޭނާއަކީ ހިތާ ރޫހުން ޗުބާކާގެ ރޯލަށް ހުރިހާ ކަމެއް ހުސްކޮށްލި މީހެއް ކަމަށާ، ޗުބާކާގެ ކޮންމެ ސީނަކުންވެސް އެކަން ސާބިތުކޮށްދޭނެ ކަމަށެވެ.
ޗުބާކާގެ ރޯލަށް އެންމެ ފުރަތަމަ ހަމަޖެއްސީ ޑޭވިޑް ޕްރޯޒީއެވެ. ނަމަވެސް އޭނާ ޑާތް ވޭޑާގެ ރޯލު ބޭނުންވުމުން ޗުބާކާގެ ކެރެކްޓާ މޭހިއުއަށް ދިނީ އޭނާގެ އިސްކޮޅުގެ ސަބަބުން ކަމަށްވެއެވެ. މޭހިއުގެ އިސްކޮޅުގައި 7 ފޫޓު 2 އިންޗި ހުއްޓެވެ.
ސްޓާވޯޒްގެ ފިލްމެއްގައި ޗުބާކާގެ ރޯލުން މޭހިއު އެންމެ ފަހުން ފެނިފައިވަނީ 2015 ވަނަ އަހަރު ރިލީޒްކުރި "ދަ ފޯސް އަވޭކަންސް" އިންނެވެ.
2017 ވަނަ އަހަރު ރިލީޒްކުރި "ދަ ލާސްޓް ޖެޑާއި"ގައިވެސް މޭހިއުވަނީ ކޮންސަލްޓަންޓެއްގެ ގޮތުގައި މަސައްކަތްކޮށްފައެވެ.
ސްޓާވޯޒްގެ އެއްވެސް ފިލްމެއްގައި މޭހިއުގެ މޫނު ފެނިފައެއް ނުވެއެވެ.
