މިއުޒިކީ ދުނިޔޭގައި ރަސްކަލެއްގެ ދަރަޖައިގައި ފިޔަޖަހަމުން އަންނަ އޭ އާރް ރަހުމާނުގެ "99 ސޯންގްސް"ގެ ލީޑުން ފެނިގެންދާނީ ފިލްމީ ދާއިރާއަށް މުޅިން އަލަށް ނިކުންނަ ފަންނުވެރިއެއްކަން ހާމަކޮށްފިއެވެ.
މިއުޒިކީ ދުނިޔެ ފަތަހަ ކުރުމަށްފަހު ފިލްމް ޕްރޮޑަކްޝަންއާއި ލިޔުންތެރިކަމާ ދިމާލަށް މިސްރާބު ޖަހާފައިވާ އޭ އާރް ރަހުމާނު ވަނީ "99 ސޯންގްސް"ގެ ލީޑުގެ ގޮތުގައި ފެނިގެންދާނެ އީހާން ބަޓްގެ ފޮޓޯ ސޯޝަލް މީޑިއާގައި އާންމުކޮށްފައެވެ.
ހިންދޫ، ތެލޫގޫ އަދި ތަމަޅަ ބަހުން "99 ސޯންގްސް" ރިލީޒް ކުރުމަށް ހަމަޖެހިފައިވާއިރު، ހުރިހާ ފޭނުންގެ ތަރުހީބާ ލޯބި، އީހާންއަށް ލިބޭނެ ކަމަށް އުއްމީދުކުރާ ކަމަށް އޭ އާރް ރަހުމާން ވަނީ ބުނެފައެވެ.
އީހާން ބަޓްވެސް ވަނީ "99 ސޯންގްސް"ގެ ލީޑުން އޭނާ ފެނިގެންދާނެ ކަން ކަށަވަރުކޮށްދީފައެވެ.
އެތައްހާސް އޮޑިޝަނެއްގެ ތެރެއިން ފަންނުވެރިން ހޮވައިގެން އޭ އާރް ރަހުމާން ކުރިއަށް ގެންދާ "99 ސޯންގްސް" މަޝްރޫއިން މުޅިން އަލަށް 3 މޫނެއް ފެނިގެންދާނެ ކަމަށް ޚަބަރު ލިބެއެވެ.
"99 ސޯންގްސް" ޑައިރެކްޓަ ކުރަނީ ވިޝްވެޝް ކްރިޝްނަމޫރުތީއެވެ. މި ފިލްމަކީ މިއުޒިކީ ރަހަ އެކުލެވޭ ލޯބީގެ ފިލްމެކެވެ. "99 ސޯންގްސް" ރިލީޒް ކުރުމަށް ހަމަޖެހިފައިވަނީ މިއަހަރުގެ ޖޫން މަހުގެ 21 ވަނަ ދުވަހުއެވެ.
