ކުއްލި ގޮތަކަށް މި ދުނިޔެއާއި ވަކިވެގެންދިޔަ ބަތޮލް ލޫކް ޕެރީ، އެންމެ ކުޅެފައިވާ މަންޒަރުތައް އާންމުކޮށްފިއެވެ.
ބުދަ ދުވަހުގެ ރޭ އާންމުކުރި "ރިވާޑޭލް"ގެ އެޕިސޯޑްއިން ކުޑަ ވަގުތު ކޮޅަކަށް ލޫކް ޕެރީ ފެނިގެންދިޔައިރު، އެއީ މިދިޔަ މަހު ކުއްލި ގޮތަކަށް ސްޓްރޯކެއް ޖެހި، މި ދުނިޔެއާއި ލޫކް ޕެރީ ވަކިވެގެން ދިއުމުގެ ކުރިން އޭނާ އެންމެ ފަހުން ކުޅުނު މަންޒަރުތައްކަން މިހާރު ވަނީ ކަށަވަރުވެފައެވެ.
ލޫކް ޕެރީ އެންމެ ފަހުން ފެނިގެންދަނީ "ރިވާޑޭލް"ގައި އޭނާގެ ފިރިހެން ދަރިފުޅު "އާޗީ" ގޮވައިގެން ހޮސްޕިޓަލަށް ގޮސް، ރޭންޑީއާއި ބެހޭ އެންމެ ފަހުގެ ޚަބަރުތައް އޮޅުންފިލުވުމަށްފަހު، އެނބުރި ގެއަށް އައިސް "އާޗީ"އަށް ހިތްވަރު ދޭތީއެވެ.
ގިނަ ބަޔަކު ސިފަކުރާ ގޮތުގައި މި މަންޒަރުތަކަކީ ބަފަޔަކާ ދަރިއެއްގެ މެދުގައި އޮންނަ ގުޅުން އޭގެ އެންމެ ފުރިހަމައަށް ދައްކުވާދޭ މަންޒަރުތަކެކެވެ.
ޝޯ ބްރޯޑްކާސްޓުކުރަމުން އަންނަ ސީޑަބްލިއު އިން ބުނީ، "ފްރެޑް އެންޑްރޫޒް"ގެ ރޯލު އަދާކުރަމުންދިޔަ ލޫކް ޕެރީ މަރުވުމުން، ވާހަކަ ފޫބައްދަމުންދާނީ ސީރީޒްއާއިގެން ކުރިއަށްދާ ވަރަކުން ކަމަށެވެ.
މިހާރު ދައްކަމުންދާ "ރީވާޑޭލް"ގެ ސީޒަންގެ ހުރިހާ އެޕިސޯޑެއް ހާއްސަކޮށްފައިވަނީ، އުމުރުން 52 އަހަރުގައި މި ދުނިޔެއާއި ވަކިވި ލޫކް ޕެރީއަށެވެ.
