ބޮލީވުޑްގެ ކުޅަދާނަ ފަންނުވެރިޔާ އާމިރު ހާން، އިންޑިއާގެ ޑޮމެސްޓިކް އެއާލައިނެއްގެ އިކޮނޮމީ ކުލާހުން ދަތުރުކޮށް އޭނާގެ ފޭނުން ސިއްސުވާލައިފިއެވެ.
އާންމުންގެ މީހަކުވެސް ހެދުން އަޅާހެން ހެދުން އަޅައިގެން އިން އާމިރު ހާން، މަތިންދާބޯޓުގެ އިކޮނޮމީ ކުލާހުގެ 'ވިންޑޯ ސީޓެއް'ގައި އިށީނދެލައިގެން އިންއިރު، އޭނާއަށް ސަޕޯޓުކުރާ ގިނަ ބަޔަކު އެ މަންޒަރު ވީޑިއޯކޮށް، ސޯޝަލް މީޑިއާގައި ހިއްސާކޮށްފައެވެ. ސޯޝަލް މީޑިއާގައި ދައުރުވަމުންދާ ބައެއް މަންޒަރުތަކަށް ބަލާއިރު، އިކޮނޮމީ ކުލާހުން އާމިރު ހާން ދަތުރުކުރާތީ ބައެއް މީހުން ހައިރާންވާތީ ޚުދު އާމިރު ހާންވެސް ހުރީ ހައިރާންވެފައިކަން އިހުސާސްކުރެވެއެވެ.
އާމިރު ހާން މިހާރު ކުރަމުންދަނީ ޓޮމް ހޭންކްސްގެ ކްލެސިކް "ފޯރެސްޓް ގަމްޕް"ގެ ހިންދީ ރީމޭކެ "ލާލް ސިންހް ޗައްދާ"އަށް ތައްޔާރުވުމުގެ ގޮތުން ކުރަންޖެހޭ ބައެއް ކަންކަމެވެ. ފިލްމުގެ ޝޫޓިންގް އޮކްޓޯބަރު މަހު ފެށުމަށް ތާވަލުކޮށްފައިވާއިރު، އާމިރު ހާންގެ ހަށިގަނޑަށްވެސް ބޮޑު ބަދަލެއް ގެންނަންޖެހޭ ކަމަށް އޭނާ ވަނީ ބުނެފައެވެ.
