ސްރީލަންކާގެ އެކި ހިސާބުތަކުގައި މިއަދު ދުވަހު ދެމުންދާ ބޮމުގެ ހަމަލާތަކާ ގުޅިގެން މުޅި ގައުމަށް ކާފިއު އިއުލާންކޮށްފިއެވެ.
ސްރީލަންކާގެ ދިފާއީ ވުޒާރާއިން މައުލޫމާތު ދޭ ގޮތުގައި ކާފިއު އިއުލާންކޮށްފައިވަނީ މިއަދު ދުވަހުގެ ހަވީރު 18:00 އިން ފެށިގެން ހޯމަ ދުވަހުގެ ފަތިހު 06:00ގެ ނިޔަލަށެވެ.
ސްރީލަންކާގައި ކާފިއު އިއުލާންކޮށްފައި މިވަނީ ދުރާލާ ރާވައިގެން އެ ގައުމުގައި ދެމުންދާ ބޮމުގެ ހަމަލާތަކާ ގުޅިގެން މަރުވި މީހުންގެ އަދަދު 180އަށްވުރެ މައްޗަށް އަރާފައިވާ ދަނޑިވަޅެއްގައެވެ. މި ހަމަލާތަކުގައި ޒަހަމްވީ މީހުންގެ އަދަދު ވަނީ 500 އަށްވުރެ މައްޗަށް އަރާފައެވެ.
މި ހަމަލާތަކުގެ ޒިންމާ އަދި އެއްވެސް ފަރާތަކުން އުފުއްލާފައެއް ނުވެއެވެ.
ސްރީލަންކާގައި ހުންނަ ދިވެހިރާއްޖޭގެ އެމްބަސީއިން ވަނީ ދިވެހިން ބޭރަށް ނިކުމެ ނޫޅުމަށް އިލްތިމާސް ކޮށްފައެވެ.
