ގިނަ އަދަދެއްގެ ދިވެހިން ދިރިއުޅެމުން އަންނަ އަވަށްޓެރި ސްރީލަންކާގެ ތިން ހޮޓަލެއް އަދި ތިން ޗާޗެއްގައި ބޮންގޮއްވި ހާދިސާ ދިވެހި ސަރުކާރުން ކުށްވެރިކޮށްފިއެވެ.
މިހާދިސާގައި މިހާތަނަށް އެއްވެސް ދިވެއްސަކަށް އަނިޔާވެފައި ނުވާކަމަށް ލަންކާގައި ހުންނަ ދިވެހި އެމްބަސީން ބުނެއެވެ. އަދި ދިވެހިންގެ ކަންކަން ގާތުން ބަލަމުންދާކަމަށް ވެސް އެމްބަސީން ބުނެއެވެ.
މި ހާދިސާތައް ކުށްވެެރިކޮށް ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވިދާޅުވީ ލަންކާގެ ކޮލަންބޯގެ އިތުރުން އެކި ތަންތަނުގައި ބޮންގޮއްވި ވާހަކަތައް އަޑު އެއްސެވީ ހައިރާންކަމާއެކު ކަމަށާއި، އެކަމާއި ހިތާމަ ކުރައްވާ ކަމަށެވެ. އަދި އެތައް ބައެއްގެ ފުރާނަ ގެއްލިގެން ދިޔަ މި ނުބައި ޓެރަރިސްޓް އަމަލު ހަރުކަށި އިބާރާތުން ކުށްވެރި ކުރައްވާ ކަމަށް ޝާހިދު ވިދާޅުވިއެވެ.
ސްރީލަންކާގެ އެކި ސަރަހައްދުތަކުގައި ބޮންތަކެއް ގޮވި ހާދިސާގައި ދިވެއްސަކަށް އަނިޔާވިތޯ ފޮރިން މިނިސްޓްރީން ބަލަމުން އަންނަ ކަމަށް އެ މިނިސްޓްރީން ވަނީ ބުނެފައެވެ. އެ މިނިސްޓްރީން ބުނީ އިމަޖެންސީ ކޮންސިއުލާ ހިދުމަތް ބޭނުންވާނަމަ ކޮންސިއުލާ ހޮޓްލައިން 7983400 އަށް ގުޅުމަށެވެ.
މިހާތަނަށް ލިބިފައިވާ މައުލޫމާތަށް ބަލާއިރު ބޮމުގެ ހަމަލާ ދީފައިވަނީ ތިން ޗާޗެއްގެ އިތުރުން ތިން ހޮޓަލެއްގައެވެ. އޭގެ ތެރޭގައި ކިންގްސްބަރީ، ސިނަމަން ގްރޭންޑް އަދި ޝަންގްރިއްލާ ހޮޓަލް ހިމެނެއެވެ. މިއީ އާންމުކޮށް ދިވެހިން ގޮސް އުޅޭ ތަންނަނެވެ. މިއީ ކައިރި ކައިރީގައި ހުންނަ ތިން ހޮޓަލެވެ.
މި ހަމަލާތަކުގައި 101 މީހަކު މަރުވިކަމަށް މިޑިއާތަކުން ރިޕޯޓް ކުރާ އިރު، 300 އަށްވުރެ ގިނަ މީހުންނަށް އެކި ވަރުގެ ޒަހަމްތައް ލިބިފައިވާކަމަށް ސްރީލަންކާގެ ކޮލަމްބޯ ނޭޝަނަލް ހޮސްޕިޓަލުން މައުލޫމާތުދެއެވެ. މިމީހުންނަށް ފަރުވާ ދެމުންދަނީ ހޮސްޕިޓަލުގައި އެޑްމިޓްކޮށްގެންނެވެ.
ބޮމުގެ ހަމަލާ އަމާޒުވި ވަގުތަކީ، ގިނަ އަދަދެއްގެ ކްރިސްޓިއަނުން އީސްޓާ ފާހަގަކުރުމަށް ޗާޗްތަކަށް ޖަމާވެފައިވާ ވަގުތެއް ކަމަށް މީޑިއާ ރިޕޯޓްތައް ބުނެއެވެ.
