ސްރީލަންކާގެ އެކި ސަރަހައްދުތަކުގައި ބޮންތަކެއް ގޮވި ހާދިސާގައި ދިވެއްސަކަށް އަނިޔާވިތޯ ފޮރިން މިނިސްޓްރީން ބަލަމުން އަންނަ ކަމަށް އެ މިނިސްޓްރީން ބުނެފިއެވެ.
ފޮރިން މިނިސްޓްރީން މި ކަން ބަލަން ފަށާފައިވަނި ގިނަ އަދަދެއްގެ ދިވެހިން ދިރިއުޅެމުން އަންނަ ލަންކާގައި މިއަދު ހެނދުނު ބޮންތަކެއް ގޮއްވާ ގިނަ ބަޔަކަށް އަނިޔާވުމާއި ގުޅިގެންނެވެ. މިނިސްޓްރީން ބުނީ އިމަޖެންސީ ކޮންސިއުލާ ހިދުމަތް ބޭނުންވާނަމަ ކޮންސިއުލާ ހޮޓްލައިން 7983400 އަށް ގުޅުއްވުމަށެވެ.
މިހާތަނަށް ލިބިފައިވާ މައުލޫމާތަށް ބަލާއިރު ބޮމުގެ ހަމަލާ ދީފައިވަނީ ދެ ޗާޗެއްގެ އިތުރުން ތިން ހޮޓަލެއްގައެވެ. އޭގެ ތެރޭގައި ކިންގްސްބަރީ، ސިނަމަން ގްރޭންޑް އަދި ޝަންގްރިއްލާގައެވެ. މިއީ ކައިރި ކައިރީގައި ހުންނަ ތިން ހޮޓަލެވެ. އަދި މިއީ ދިވެހިން އާންމުކޮށް ގޮސް އުޅޭ ތަންތަނެވެ.
މި ހަމަލާތަކުގައި 300 އަށްވުރެ ގިނަ މީހުންނަށް އެކި ވަރުގެ ޒަހަމްތައް ލިބިފައިވާކަމަށް ސްރީލަންކާގެ ކޮލަމްބޯ ނޭޝަނަލް ހޮސްޕިޓަލުން މައުލޫމާތުދެއެވެ. މިމީހުންނަށް ފަރުވާ ދެމުންދަނީ ހޮސްޕިޓަލުގައި އެޑްމިޓްކޮށްގެންނެވެ.
ބޮމުގެ ހަމަލާ އަމާޒުވި ވަގުތަކީ، ގިނަ އަދަދެއްގެ ކްރިސްޓިއަނުން އީސްޓާ ފާހަގަކުރުމަށް ޗާޗްތަކަށް ޖަމާވެފައިވާ ވަގުތެއް ކަމަށް މީޑިއާ ރިޕޯޓްތައް ބުނެއެވެ.
