ބޯކޮށް ވާރޭ ވެހުމުގެ ސަބަބުން އައްޑޫ ސިޓީ ފޭދޫގެ މަގުތަކުގައި ފެން ބޮޑުވެއްޖެއެވެ.
ފޭދޫގެ މަގުތަކުގައި ފެން ބޮޑު ވުމުގެ ސަބަބުން، މަގުތަކުން ފެން ހިންދުމުގެ މަސައްކަތުގައި އެމްއެންޑީއެފް ގެ ސަދަން އޭރިއާ ގެ ސިފައިން މިއަދު ހަރަކާތްތެރި ވެފައި ވާކަމަށް އެމްއެންޑީއެފުން ބުނެއެވެ.
މިއަދު 12:40 އިން ފެށިގެން ހަވީރު 15:40 ދެމެދަށް ފުވައްމުލަކު ސިޓީ އިން ފެށިގެން އައްޑޫ ސިޓީއާ ހަމައަށް މީޓިއޮރޮލޮޖީ އޮފީހުން ވަނީ ޔެލޯއެލާޓް ނެރެފައެވެ.
އެކަމަކު ހުވަދޫއިން ފެށިގެން އައްޑޫ ސިޓީ އާ ދެމެދަށް މިހާރު ނެރެފައިވަނީ ވައިޓް އެލާޓެކެވެ. މެޓް އޮފީހުން ބުނީ މިއަދު އިރުއޮއްސި 18:00 އިން ފެށިގެން މިރޭ 23:00 އާ ހަމައަށް ހުވަދު އަތޮޅުން ފެށިގެން އައްޑޫ ސިޓީ އަށް ބޯކޮށް ވާރޭވެހުމާއެކު ގުގުރާނެއެވެ.
ވާރޭ ނުވެހޭތާ ގިނަ ދުވަސްތަކެއް ވެފައިވާތީ، އިއްޔެ މެންދުރު ނަމާދަށް ފަހު މުޅި ރާއްޖޭގެ ހުރިހާ ރަށެއްގައި އިސްތިސްގާ ނަމާދުކޮށްފައި ވެއެވެ. އިސްތިސްގާ ނަމާދަށް ފަހު މާލެއާ ހުޅުމާލެ އަށް ރޭ ވަނީ ބޯކޮށް ވާރޭ ވެހިފައެވެ. މެޓް އޮފީހުން ބުނީ، ރޭ މާލެއާ ހުޅުމާލެއަށް 8 މިލިމީޓަރުގެ ވާރޭ ވެހިފައި ވާކަމަށެވެ. މީގެ އިތުރުން ރާއްޖޭގެ އެކި ސަރަހައްދުތަކަށް އިއްޔެ މެންދުރުން ފެށިގެން ދަނީ ވިއްސާރަ ކުރަމުންނެވެ.
