ހުސްވި މާޗު މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) މެދުވެރިކޮށް ދައުލަތަށް 1.51 ބިލިއަން ރުފިޔާގެ ބޮޑު އާމްދަނީ އެއް ލިބިއްޖެއެވެ.
މީރާގެ ތަފާސް ހިސާބުތައް ދައްކާ ގޮތުން، މާޗުމަހު ޓެކުހުގެ ގޮތުގައި ދައުލަތަށް ޖުމްލަ 981 މިލިއަނަށް ވުރެ ގިނަ ރުފިޔާ ލިބިފައިވެއެވެ. އަދި ފީ އާއި ޗާޖުގެ ގެ ގޮތުގައި 531 މިލިއަނަށް ވުރެ ގިނަ ރުފިޔާ ލިބިފައިވެއެވެ.
މިދިޔަ މަހު މީރާއަށް ލިބުނު އާމްދަނީގެ 48.4 ޕަސެންޓަކީ ގުޑްސް އެންޑް ސާވިސެސް ޓެކްސް (ޖީއެސްޓީ) އިން ލިބުނު ފައިސާއެވެ. އެ ގޮތުން ޖީއެސްޓީގެ ގޮތުގައި 732 މިލިއަނަށް ވުރެ ގިނަ ރުފިޔާ ލިބިފައި ވެއެވެ. އެކަމަކު މިއީ، މިދިޔަ އަހަރުގެ މާޗު މަހު ލިބުނު އަޅާ ބަލާއިރު 54 މިލިއަން ދަށް އަދަދެކެވެ.
ދެވަނައަށް އެންމެ ގިނައިން ފައިސާ ލިބިފައި ވަނީ، ޓޫރިޒަމަށް ދޫކޮށްފައިވާ ބިންތަކުން ނެގޭ ޓެކްސް އިންނެވެ. އެއީ އާމްދަނީގެ 23.5 ޕަސެންޓެވެ. މީރާގެ އާމްދަނީގެ 5.8 ޕަސެންޓް ބިޒްނަސް ޕްރޮފިޓް ޓެކްސް (ބީޕީޓީ) ގެ ގޮތުގައި ލިބިފައި ވާއިރު، 5.5 ޕަސެންޓަކީ ގްރީން ޓެކުހުގެ ގޮތުގައި ލިބުނު އާމްދަނީ އެވެ. އެއާޕޯޓު ޑިވެލޮޕްމަންޓް ފީއަށް 4.5 ޕަސެންޓް ލިބުނު އިރު އަނެއް 12.4 ޕަސެންޓަކީ އެހެނިހެން ޓެކުހާއި ޗާޖު އަދި ފީގެ ގޮތުގައި މީރާއަށް ވަދެފައިވާ ފައިސާއެވެ.
މީރާއަށް މިދިޔަ އަހަރު ގެ މާޗް މަހު ޖުމްލަ އާމްދަނީގެ ގޮތުގައި 1.54 ބިލިއަން ރުފިޔާ ލިބިފައިވެއެވެ. އެހެން ކަމުން މީރާއަށް މިއަހަރުގެ މާޗުމަހު ލިބުނު އާމްދަނީ އަކީ މިދިޔަ އަހަރާ އަޅާބަލާއިރު 33 މިލިއަން ރުފިޔާ ދަށް އަދަދެކެވެ.
