މަޖިލިސް އިންތިހާބާ ގުޅިގެން އާދީއްތަ ދުވަސް ސަރުކާރު ބަންދު ދުވަހެއްގެ ގޮތުގައި ރައީސް އިބްރާހިމް މުހައްމަދު ސޯލިހު ހަމަޖައްސަވާފައި ވާތީ، ސަރުކާރަށް 100 ދުވަސް ހަމަވާ ދުވަސް ބަދަލުވެއްޖެއެވެ.
މި ސަރުކާރުގެ ފުރަތަމަ 100 ދުވަހުގެ ގޮތުގައި ގުނަމުން ދަނީ ސަރުކާރު ބަންދު ދުވަސްތައް ނުހިމެނޭ ގޮތަށެވެ. އެހެން ކަމުން ސަރުކާރު ބަންދު ދުވަސްތަކުގެ ލިސްޓަށް އިތުރުވި ދުވަހާ އެކު ސަރުކާރަށް 100 ދެން ފުރޭނީ މި އޭޕްރީލް މަހުގެ 15 ވަނަ ދުވަހުގައެވެ.
ސަރުކާރަށް 100 ދުވަސް ފުރުން ފާހަގަ ކުރަނީ، އެއީ ސަރުކާރުގެ ފުރަތަމަ ދުވަސްތައް ކަމަށް ވެފައި، އެ ދުވަސްތަކުގައި ސަރުކާރުން ކުރުމަށް ވައުދުވެފައިވާ ކަންތައްތައް ފުއްދައިދިނުމަށެވެ.
ސަރުކާރަށް 100 ދުވަސް ހަމަވާން ކައިރިވެފައި ވާއިރު، 100 ދުވަހުގެ ވައުދުގެ ތެރެއިން 83 ޕަސެންޓް ފުއްދިފައި ވާކަމަށް ރައީސް ސޯލިހު ވިދާޅުވެފައި ވެއެވެ.
