ޔާމީންގެ އެކައުންޓުތައް ފްރީޒްކުރަން ސިވިލް ކޯޓުން ނެރުނު އަމުރު ހައިކޯޓުން ބާތިލްކުރުމުން، ޕްރޮސެކިއުޓާ ޖެނެރަލް (ޕީޖީ) ގެ އޮފީހުން އެ މައްސަލަ ސުޕްރީމް ކޯޓުގައި އިސްތިއުނާފް ކޮށްފިއެވެ.
ޕީޖީން މި މައްސަލަ ސުޕްރީމް ކޯޓުގައި އިސްތިއުނާފު ކޮށްފައި ވަނީ އިއްޔެއެވެ.
ޔާމީންގެ އެކައުންޓުތަކުގައި ހުރި 100 މިލިއަނަށްވުރެ ގިނަ ރުފިޔާ ފްރީޒް ކުރުމަށް ކްރިމިނަލް ކޯޓުން ނެރުނު އަމުރު ހައިކޯޓުން ބާތިލު ކުރީ އާދީއްތަ ދުވަހުއެވެ. ޔާމީންގެ އެކައުންޓްތައް ފްރީޒް ކޮށްފައިވަނީ، ސަރުކާރުގެ އިދާރާތަކުން ފުލުހުންނަށް ހުށަހެޅުނު މައްސަލައަކާއި ގުޅިގެން، ޔާމީންގެ އެކައުންޓްތައް ފްރީޒް ކޮށްދިނުމަށް ޕީޖީން ކްރިމިނަލް ކޯޓުގައި އެދުމުން، އެކޯޓުން އެކަމަށް އަމުރު ކޮށްފައި ވާތީއެވެ.
ޔާމީންގެ އެކައުންޓްތައް ދޫކޮށްލުމަށް ހައިކޯޓުން ކުރި ހުކުމްގައި ބުނެފައިވަނީ، އެކަމުގައި ދައުލަތުން އަމަލުކޮށްފައި ވަނީ ޖިނާއީ އިޖުރާއަތުގެ ގާނޫނުގެ 72 ވަނަ މާއްދާ 73 ވަނަ މާއްދާގައި ބުނާ އިޖުރާއަތްތަކާ އެއްގޮތަށް ނޫންކަން ޝަރީއަތަށް ސާބިތުވާ ކަމަށެވެ. އަދި އެމްއެމްއޭގެ ސިޓީއާއި އެކައުންޓް ފްރީޒް ކުރުމުގެ އަމުރު ނެރެދިނުމަށް އެދި ކްރިމިނަލް ކޯޓަށް ހުށަހެޅުމާއި ދެމެދު މޮނިޓަރިން އަމުރަކަށް އެދި ހުށަހެޅުމަށް އެކަށީގެންވާ މުއްދަތެއް ދައުލަތަށް ލިބިގެން ގޮސްފައި ވާއިރު، ދައުލަތުގެ ފަރާތުން މޮނިޓަރިން އަމުރަކަށް އެދި ހުށަހަޅާފައި ނުވާކަމަށް ވެސް ހުކުމްގައި ބުނެފައިވެއެވެ.
