ކުރީގެ ރައީސް އަބްދުﷲ ޔާމީން ގެ އަބުރާ ބެހިގެން، ބްރޯޑްކާސްޓިން ކޮމިޝަނުން، 'ރާއްޖެ ޓީވީ' ޖޫރިމަނާ ކޮށްފައި ވަނީ ރަނގަޅަށް ކަމަށް ސިވިލް ކޯޓުން ހުކުމް ކޮށްފިއެވެ.
ރައީސް ޔާމީންގެ އަބުރާ ބެހިގެން ބްރޯޑްކާސްޓިން ކޮމިޝަނުން 'ރާއްޖެ ޓީވީ' ޖޫރިމަނާ ކޮށްފައި ވަނީ، 2016 ވަނަ އަހަރުގެ އޮކްޓޯބަރު މަހުގެ 26 ވަނަ ދުވަހުއެވެ.
ސިވިލް ކޯޓުގެ ހުކުމުގައި ބުނެފައި ވަނީ، ބްރޯޑްކާސްޓިން ކޮމިޝަނުން އެ ޗެނަލް ޖޫރިމަނާ ކޮށްފައި ވަނީ، އަބުރު ރައްކާތެރި ކޮށްދިނުމާއި، ހިޔާލު ފާޅު ކުރުމުގެ ގާނޫނުގެ ދަށުން، އެ ކޮމިޝަނުން އެކުލަވާލައި ގެޒެޓް ކޮށްފައިވާ ޖޫރިމަނާ ކުރުމުގެ އުސޫލާ އެއްގޮތް ވާ ގޮތުގެ މަތީން ކަމަށެވެ.
އެހެން ކަމުން ބްރޯޑްކާސްޓިން ކޮމިޝަނުގެ އެ ނިންމުން ބާތިލު ކޮށްދެވެން ނެތް ކަމަށް، ސިވިލް ކޯޓުގެ ހުކުމް ގައި ވެއެވެ.
މިދިޔަ ސަރުކާރުގައި، އަބުރާ ބެހުމުގެ ތަފާތު އެކި މައްސަލަ ތަކުގައި، އެކި ފަހަރު މަތީން ބްރޯޑްކާސްޓިން ކޮމިޝަނުން 'ރާއްޖެ ޓީވީ' ޖޫރިމަނާ ކޮށްފައި ވެއެވެ. އެހެން ނަމަވެސް، އެ ޗެނަލުން ވަނީ 'އަބުރު ފަންޑު ފޮށި' ގެ ނަމުގައި ފަންޑު ފޮށްޓެއް ހުޅުވައިގެން، ހުރިހާ ފައިސާއެއް ދައްކާ ހަލާސް ކޮށްފައެވެ.
