މިހާރުގެ ސަރުކާރުން ވާ ވައުދު ތަކަކީ ހިޔާލީ ފޮލައެއް ނޫން ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ސަރުކާރުގެ ފުރަތަމަ 100 މަސައްކަތު ދުވަހުގެ ތެރޭގައި ހާސިލު ވި ބައެއް ކަންތައްތައް ހިއްސާ ކުރައްވަމުން ރައީސް ސޯލިހު ވިދާޅުވީ، ސަރުކާރުން ވާ ވައުދަކީ ތެދު ހަގީގަތެއް ކަން ބަހާއި އަމަލުން ދައްކަމުން ދާ ކަމަށެވެ.
އެ ގޮތުން ރައީސް ސޯލިހުގެ ރިޔާސީ ވައުދުފުޅު ތަކުގެ ތެރެއިން 'ނޫ އިގްތިސާދު' ގެ ދަށުން ހާސިލު ވެފައިވާ ބައެއް ކަންތައްތައް ރައީސް ހިއްސާ ކުރައްވާފައި ވެއެވެ. އޭގެ ތެރޭގައި ދަނަޑުވެރި ކަމުގެ މަސައްކަތުގައި އުޅޭ އަމިއްލަ ފަރާތް ތަކަށް މާލީ އިދާރާތަކުންނާއި ބޭންކް ތަކުން ލޯނު އަދި ކްރެޑިޓް ސްކީމް ގައި ބައިވެރި ވެވޭނޭ މަގު ތަނަވަސް ކޮށްދިނުމާއި، ދަނޑުވެރިކަން ކުރުމަށް ގެންނަ މުދަލުން ޑިއުޓީ ކަނޑާލާފައި ވާކަން ރައީސް ފާހަގަ ކުރައްވައެވެ. އޭގެ އިތުން މަސް ވެރިންނަށް ޑީސަލުން އިމްޕޯޓު ޑިއުޓީ ކަނޑާލުމާއި 'މަސްދޯނި އެކައުންޓް' ހުޅުވި ހުރިހާ މަސްވެރިންނަށް ބޭންކިން ގެ ތެރެއަށް ވަނުމުގެ ފުރުސަތު މިހާރު ހުޅުވާލާފައި ވާކަމަށް ވެސް ރައީސް ސޯލިހު ވިދާޅު ވެއެވެ.
އަދި 24 ގަޑިއިރަށް ވިޔަފާރި ހުޅުވާލެވޭ އުސޫލު ކަނޑަ އެޅުމާއި، ހަފްތާ ނިންމުމުގެ ގޮތުން 'ވީކްއެންޑް މާކެޓް' ހުޅުވާލުމުގެ އިތުރުން މުނި ފޫހި ފިލުވުމުގެ ޕްރޮގްރާމް ފެށުން ވެސް 100 ދުވަހުގެ ތެރޭގައި ކުރެވިފައިވާ ކަންތައްތަކުގެ ގޮތުގައި ރައީސް ސޯލިހު ފާހަގަ ކުރައްވައެވެ.
