ހަވާ ފަޓާސް ބަރި އެއް ހެން ކުރީގެ ރައީސް މުހައްމަދު ނަޝީދު އަށް ހުކުމް ކުރި ގޮތަށް ކުރީގެ ރައީސް އަބްދުﷲ ޔާމިން އާ ދޭތެރެ މިހާރު ކޯޓުތަކުން ކަންތައް ކުރަމުން ނުދާ ކަމަށް ޑިފެންސް މިނިސްޓަރު މާރިޔާ އަހްމަދު ދީދީ ވިދާޅުވެއްޖެއެވެ.
މިހާރު ކޯޓުތައް މިނިވަން ވެފައިވާ މިންވަރާ ގުޅޭ ގޮތުން ވާހަކަ ދައްކަވަމުން މާރިޔާ ވިދާޅުވީ، ނަޝީދު އާ ދޭތެރޭ އޭރު ކޯޓުތަކުން ކަންތައް ކުރި ގޮތަށް މިހާރު ޔާމިން އާ ދޭތެރޭ ކަންތައް ކުރާ ތަން ނުފެންނަ ކަމަށެވެ. އަދި އިޖުރާއަތުގެ ތެރެއިން ރަނގަޅަށް ޔާމީނަށް ފުރުސަތު ވެސް ލިބިލައްވަމުން ދާކަމަށް މާރިޔާ ވިދާޅުވިއެވެ.
"އަޅުގަނޑަށް ފެނިގެން ދިޔައީ އަޅުގަނޑުމެންގެ މި ސަރުކާރުގަ، ކޯޓުތައް މިނިވަންވީމަ، ކޯޓުތަކުން ވެސް އަޅުގަނޑުމެންނަކަށް ނުފެނޭ ހަމަ ރައީސް ޔާމީން އާ ދޭތެރޭ ރައީސް ނަޝީދާ ދޭތެރޭ އެ ހަވާ ފަޓާސް ބަރިއެއް ހެން، ހުކުމް ކޮށްލިހެން، އެކަން ކުރާ ތަނެއް، ރީއްޗަށް އިޖުރާއަތުގެ ތެރެއިން އެބޭފުޅުންނަށް ފުރުސަތު ވެސް ލިބެމުން އެދަނީ." މާރިއާ ވިދާޅުވިއެވެ.
މާރިޔާ ވިދާޅުވީ، ހައިކޯޓުގެ ތެރެއިން ޔާމީން މިނިވަން ވެގެން ދިޔުމުން ވެސް ކޯޓުތަކަށް ލިބިފައިވާ މިނިވަންކަން ހާމަވެގެން ހިނގައްޖެ ކަމަށެވެ.
ކުރީގެ ސަރުކާރުން ރައްޔިތުންނަށް ހިޔާލު ފާޅު ކުރުމުގެ މިނިވަން ކަން ވެސް ނުދޭ ކަން ފާހަގަ ކުރައްވާ މާރިޔާ ވިދާޅުވީ، 'ރައްޔިތުންގެ އަނގަމަތީ ޓޭޕް' އަޅުވަން އޭރު ސަރުކާރުން ވަރަށް މަސައްކަތް ކުރި ކަމަށެވެ. އަދި މީޑިޔާތަކުގައި ވެސް އޭރު 'ތަޅު އަޅުވާފައި' ވާކަމަށް ވެސް މާރިޔާ މިރޭ ވިދާޅު ވިއެވެ.
މަނީ ލޯންޑަރިން ގެ މައްސަލައެއްގެ ޝަރީއަތް ނިމެންދެން ޔާމީން ޖަލުގައި ބެހެއްޓުމަށް ކްރިމިނަލް ކޯޓުން ކުރި ހުކުމް ހައިކޯޓުން ބާތިލު ކުރީ މިދިޔަ ބުރާސްފަތި ދުވަހު އެވެ.
