ތިނަދޫ އުތުރު ދާއިރާ އަށް ވާދަ ކުރާ އެމްޑީޕީގެ ކެންޑިޑޭޓް އަބްދުﷲ މުޣްނީ އަށް އެމްޑީޕީން ކުރި ތާއީދު ގެންދިޔުމަށް ފަހު، އެ ނިންމުން ބަދަލު ކޮށް "އަނިޔާވެރިޔާ" އާ އަތު ގުޅާލާނެ ކަމަށް އުއްމީދު ކޮށްފައި ނުވާކަމަށް، އޭނާ ގެ ކުރީގެ އަންހެނުން އައިޝަތު ރިޒްނާ ބުނެފިއެވެ.
ރިޒްނާ ކުރި ގެވެށިއަނިޔާގެ ތުހުމަތަކާއި ގުޅިގެން މުޣްނީ އަށް އެމްޑީޕީން ކުރި ތާއީދު އަނބުރާ ގެންދިޔުމަށް ފަހު، މިދިޔަ ބުދަދުވަހު އެމްޑީޕީން ވަނީ އޭނާއަށް އަލުން ތާއީދު ކުރުމަށް ނިންމާފައެވެ.
މި ކަމާ ގުޅިގެން ރިޒްނާ މިއަދު ކުރި ޓްވީޓު ތަކުގައި ވާ ގޮތުން، އޭނާ އަށް ކުރި އަނިޔާ ގެ ވާހަކަ، ސޯޝަލް މީޑިއާގައި ހިއްސާ ކުރުމުގެ ކުރިން، އެކަމުގައި އެޅޭނެ ފިޔަވަޅެއް އޮތްތޯ އެމްޑީޕީގެ ބައެއް މެންބަރުންނާ ވާހަކަ ދެއްކި ކަމަކަށް ބުނެފައި ވެއެވެ. އެހެން ނަމަވެސް އެކަމުން ކުރި އެރުމެއް ނުލިބުނު ކަމަށާ، އެފަދަ މީހުން ޕާޓީ ތަކުގެ ޕްރައިމަރީގައި ވާދަ ނުކުރެވޭނެ ގޮތެއް ހަމަޖެހިފައި ނުވާކަމަށް އޭނާ ބުނެފައި ވެއެވެ.
ރިޒްނާ ބުނީ، މުޣްނީ އާ ގުޅެ ގޮތުން އޭނާ ހިއްސާ ކުރި މައުލޫމާތަކީ، މުޣްނީ އަށް ވޯޓުދިން މެޖޯރިޓީ މީހުންނަށް މައްސަލަ އަކަށް ނުވި ކަމަށެވެ. އަދި އެއިން އެނގިގެން ދަނީ، އަނިޔާ ކުރުމަކީ މިހާރުގެ މުޖުތަމައު ބަލައިގަންނަ ކަމެއް ކަމުގައި ރިޒްނާ ބުނެއެވެ.
ރިޒްނާ އިތުރަށް ބުނީ އޭނާ ހިއްސާ ކުރި ވާހަކަ ތަކަކީ 'ގެވެށި އަނިޔާގެ ގާނޫނު' ވުޖޫދު ވުމުގެ ކުރިން ހިނގާފައިވާ ކަންތައްތަކެއް ކަމަށެވެ. އަދި އެ މައްސަލަ އޭނާ އޭރު ޕޮލިހަށް ހުށައެޅި ކަމަށް ވެސް އޭނާ ބުނެފައި ވެއެވެ.
ރިޒްނާ ގެ ޓްވީޓުތަކުގައި، 2000 ވަނަ އަހަރު އޭނާ ޕޮލިހަށް ހުށައަޅާފައިވާ އަނިޔާ ގެ މައްސަލައެއްގެ ރިކޯޑު ހިއްސާ ކޮށްފައި ވެއެވެ. އެހެން ނަމަވެސް އެ އަނިޔާ ކުރިމަތި ވީ ކޮން ފަރާތަކުން ކަމެއް ރިކޯޑުން އެނގޭކަށް ނެތެވެ.
އެ ރިކޯޑާ ބެހޭ ގޮތުން ރިޒްނާ ބުނެފައި ވަނީ، އެ ރިކޯޑުގައި އަނިޔާ ކުރި ފަރާތުގެ ނަން ހާމަ ކޮށްފައި ނުވުމުން، މުޣްނީގެ ނަން ޕޮލިސް ރިކޯޑު ގައި ނެތް ސަބަބު މިހާރު ސާފުވާ ކަމަށެވެ. އަދި މުޣުނީގެ ކުށުގެ ރެކޯޑު ސާފު ކޮށްދިނުމުގައި ޕޮލިހުން އަވަސް އަރުވާލާފައި ވާކަމަށް ވެސް ރިޒްނާ ބުނެފައި ވެއެވެ.
މުޣްނީ އަށް ތުހުމަތު ކުރެވޭ ގެވެށި އަނިޔާގެ މައްސަލައިގައި ފުލުހުންގެ އިދާރާއިން ބުނެފައި ވަނީ މުޣުނީގެ މައްޗަށް ތުހުމަތު ކުރެވޭ ގެވެށި އަނިޔާގެ މައްސަލައެއް އެއްވެސް އިރެއްގައި ފުލުހުންގެ އިދާރާއަށް ހުށަހެޅިފައި ވާކަން ފުލުހުންގެ ރެކޯޑުތަކުން އެނގެން ނެތް ކަމަށެވެ.
ރިޒްނާ ގެ މި ޓްވީޓަށް ހެރިޓޭޖް މިނިސްޓަރު ޔުމްނާ މައުމޫނާއި، ގަލޮޅު ދެކުނު ދާއިރާއަށް ވާދަ ކުރައްވާ އެމްއާރްއެމް ގެ ކެންޑިޑޭޓް އާމިނަތު ނާދިރާ ވަނީ 'ލައިކް' ދެއްވާފައެވެ.
