ކުރިއަށް އޮތް ރައްޔިތުންގެ މަޖިލީސް އިންތިހާބުގައި ޕީޕީއެމް އާއި ޕީއެންސީ އަދި ޖޭޕީއަށް އަޣުލަބިއްޔަތު ދިނުމަށް އެދިވަޑައިގެން ރައްޔިތުންގެ ކިބައިން ރައީސް އަބްދުﷲ ޔާމީން އާދޭސް ދަންނަވައިފިއެވެ. މަޑުއްވަރީ ދާއިރާއަށް ވާދަކުރައްވާ ކުރީގެ ޑިފެންސް މިނިސްޓަރު އާދަމް ޝަރީފުގެ ކެމްޕޭނު ޖަލްސާއެއްގައި ފޯނު މެދިކޮށް ބައިވެރިންނާ މުހާތަބު ކުރައްވަމުން ޔާމީނު ވިދާޅުވީ ރާއްޖެއަށް ހަމަޖެހުމެއް ލިބެން އޮތް ހަމަ އެކަނި ގޮތަކީ ޕީޕީއެމް އަދި ޕީއެންސީ އާއި ޖޭޕީއަށް މަޖިލީހުގެ އަޣުލަބިއްޔަތު ދިނުމެވެ.
"އަޅުގަނޑު ހަމަ ކުރާނެ އާދޭހަކީ. އަޅުގަނޑު ތަކުރާރުކޮށް ދަންނަވާނެ އިލްތިމާސަކީ ދިވެހިރާއްޖޭގެ މަސްލަހަތު އޮތީ ދިވެހިރާއްޖޭގެ އަމާންކަން އޮތީ. ދިވެހިރާއްޖޭގެ އެއްވެސް ބަޔަކަށް ހަމަނޭވާ ލެވެން އޮތީ، މިފަހަރު ރައްޔިތުންގެ މަޖިލީހުގެ އިންތިހާބުގައި ގިނަ ގޮޑިތަކެއް، ބޮޑު އަޣުލަބިއްޔަތެއް ޕީޕީއެމް ޕީއެންސީ އަޅުގަނޑުމެން ތިން ޕާޓީއަށް ރައްޔިތުން ދެއްވައިގެން" ރައީސް ޔާމީން ވިދާޅުވި އެވެ.
ޔާމީން ވިދާލުވީ ވަގުތީ ގޮތުން ލިބޭ ފައިސާ ފޮއްޗަކަށް ގައުމު ވިއްކާ ނުލައި ރާއްޖެއަށްޓަކައި ކޮށްދޭ ކަމެއްގެ ގޮތުގައި އަންނަ މަޖިލީހުގެ މެޖޯރިޓީ އެ ތިން ޕާޓީއަށް ހޯދައި ދިނުމަށެވެ.
"ތިބޭފުޅުންނާ އެކީ ފާގަތި ދުވަސްތަކެއް ހޭދަކުރަން އަޅުގަނޑުވެސް ބޭނުންވޭ. އެހެންނަމަވެސް އަޅުގަނޑަށްވެސް ކުރެވޭނީ ކޮންމެވެސް ވަރަކަށް މަސައްކަތް. އަޅުގަނޑަށް ވީވަރެއް ކުރެއްވިޖެ. ދެން ރައްޔިތުން އަޅުގަނޑާއެކީ ތިއްބަވަން ބޭނުންފުޅު ނުވާ ކަމަށްވަންޏާ އަޅުގަނޑުގެ ހިދުމަތުގެ ސޮފްހާވެސް މިހާ ހިސާބުން ޖެހޭނީ ނިންމާލަން." ހާލަތު ބަދަލު ކުރުމުގެ ވާހަކަ އަށް އިޝާރާތް ކުރައްވަމުން ޔާމީން ވިދާޅުވި އެވެ.
ޔާމީނު ވިދާޅުވީ ހާލަތު ބަދަލު ކުރުމުގެ ބޭނުން ނެތް ކަމުގައި ވާނަމަ ﷲ ގެ މިންވަރުފުޅުގައިވެސް އެކަން ނޯންނާނެ ކަމަށެވެ. އެހެންކަމަށް ވުމާއެކު ހާލަތު ބަދަލު ކުރުމަށް މަޖިލީސް މުހިންމު ވާކަމަށް އެމަނިކުފާނު ވިދާޅުވިއެވެ.
އަންނަ ރައްޔިތުންގެ މަޖިލީހުގެ އިންތިހާބު އޮންނާނީ މިފެށޭ އޭޕްރީލް މަހުގެ 6 ވާ ހޮނިހިރު ދުވަހުއެވެ. ރައްޔިތުންގެ މަޖިލީހުގައި ހިމެނޭ 87 ދާއިރާއަށް 386 ކެންޑިޑޭޓުން ވާދަ ކުރެއެވެ. މިފަހަރުގެ އިންތިހާބުގައި ވޯޓުލުމުގެ ހައްގު ލިބިފައިވާ 264،589 މީހުން ތިބި އިރު ވޯޓު ލުމަށްޓަކައި 501 ވޯޓުފޮށި ބެހެއްޓުމަށް ވަނީ ހަމަޖެހިފައެވެ.
