އިންތިހާބީ ވޯޓަކުން ހޮވާ އެއްވެސް އިސް މަގާމެއްގައި ވެނެޒުއޭލާގެ އިދިކޮޅު ލީޑަރު ހުއާން ގުއައިދާއޯއަށް ކުރިއަށް އޮތް 15 އަހަރު ދުވަހު ނުހުރެވޭ ގޮތަށް ނިންމާފައިވާކަމަށް، ސިޔާސީ ހަލަބޮލިކަމެއްގެ ތެރެއަށް ވެއްޓިފައިވާ ވެނެޒުއޭލާގެ ސްޓޭޓް ފައިނޭންޝަލް ކޮންޓްރޯލާ ވިދާޅުވެއްޖެއެވެ.
15 އަހަރު ދުވަހުގެ މުއްދަތަކީ މިފަދަ މަގާމަކުން މީހަކު ސަސްޕެންޑް ކުރުމަށް ވެނެޒުއޭލާގެ ގާނޫނު ހުއްދަ ދޭ އެންމެ ދިގު މުއްދަތެވެ.
ވެނެޒުއޭލާގެ ކޮމްޕްޓްރޯލާ އެލްވީސް އަމޮރޯސޯ ވިދާޅުވީ، ގުއާއިދޯގެ ޒާތީ މާލީ ބަޔާންތަކުގައި މައްސަލަތަކެއް އެބަހުރި ކަމަށެވެ.
އިދިކޮޅު ފަރާތްތަކުން ކޮންޓްރޯލް ކުރަމުންދާ ވެނެޒުއޭލާގެ ގާނޫނު ހަދާ މަޖިލީހުގެ ރިޔާސަތުގައި އިންނެވި ގުއާއިދޯވަނީ، ވެނެޒުއޭލާގެ ވަގުތީ ރައީސަކީވެސް އޭނާކަމަށް މިއަހަރުގެ ޖަނަވަރީ މަހުގެ ތެރޭގައި އަމިއްލައަށް އިއުލާންކޮށްފައެވެ. އެމެރިކާވެސް ހިމެނޭ ގޮތަށް ދުނިޔޭގެ އެކި ހިސާބުތަކުން 50 އަށްވުރެ ގިނަ ގައުމުން ވަނީ ގުއާއިދޯގެ މި ނިންމުމަށް ތާއީދުވެސް ކޮށްފައެވެ.
އިންތިހާބަކުން އިސްކުރާ އެއްވެސް މަގާމަކަށް ގުއާއިދޯއަށް ދެން ވާދަކުނުކުރެވޭ ގޮތަށް އޭނާ ސަސްޕެންޑްކޮށްފައިވާއިރު، މި ނިންމުން ތަންފީޒު ކުރަން ފަށާނީ ވެނެޒުއާލާގެ ގާނޫނު ހަދާ މަޖިލީހަށް މެމްބަރުން އިންތިހާބު ކުރުމަށް ދެން ބާއްވާ އިންތިހާބެއްގައި ގުއާއިދޯ ވާދަކުރަން ގަސްތުކުރާ ހިސާބުން ކަމަށް ޚަބަރު ލިބެއެވެ.
ކަންމިހެންއޮތްއިރު، ގުއާއިދޯ ވަނީ އަމޮރޯސޯގެ ނިންމެވުމަށް ގޮންޖަހާފައެވެ. އެގޮތުން އަމޮރޯސޯއަކީ އޯޑިޓާ ޖެނެރަލް ނޫން ކަމަށާ، އޯޑިޓާ ޖެނެރަލް ކަމުގެ މަގާމަށް މީހަކު ހަމަޖެއްސުމުގެ ހައްގު ލިބިފައިވާ ހަމައެކަނި ބާރަކީ، ގާނޫނީ ހައިސިއްޔަތު ލިބިފައިވާ ގާނޫނު ހަދާ މަޖިލީސް ކަމަށްވެސް ގުއާއިދޯ ވަނީ ބުނެފައެވެ.
ވެނެޒުއާލާގެ ވަގުތީ ރައީސަކީ ގުއާއިދޯކަމަށް އޭނާ ބުނާއިރު، ވެނެޒުއާލާގެ ރައީސް ކަމުގެ މަގާމުގައިވީ ދުވަސްތަކުގައި ހުންނެވި ނިކޮލާއި މަދޫރޯވެސް ގެންދަވަނީ އެގައުމުގެ ރައީސަކީ އެމަނިކުފާނު ކަމަށް ވިދާޅުވަމުންނެވެ.
ވެނެޒުއޭލާގެ ދާހިލީ ހަމަނުޖެހުންތަކުގެ ތެރެއަށް އެމެރިކާއާއި ރަޝިޔާއިންވެސް ވަދެފައިވާއިރު މި ދެގައުމުން ދަނީ ބަހުގެ ވަރުގަދަ ހަމަލާތަކެއް ބަދަލު ކުރަމުންނެވެ.
