ގާނޫނީ ވަކީލު އަދި ބ.ތުޅާދޫ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް ހިސާން ހުސައިން ކުޑަކުދިން ތަކަކަށް އަނިޔާކުރެއްވި ކަމަށް ކޮށްފައިވާ ތުހުމަތުތަކާ ގުޅިގެން ހިތާމަ ކުރައްވަ ކަމަށާއި، އެކަމުގައި އެއްވެސް ހިއްސާއެއް ނޯންނާނެ ކަމަށް، ގާނޫނީ ވަކީލު އަދި އެ ދާއިރާއަށް ވާދަ ކުރައްވާ މައުމޫން ރީފޯމް މޫވްމަންޓް (އެމްއާރްއެމް) ގެ ކެންޑިޑޭޓް އިބްރާހިމް އަފީފް ވިދާޅުވެއްޖެއެވެ.
'ދަޕްރެސް' އަށް މައުލޫމަތު ދެއްވަމުން އަފީފް ވިދާޅުވީ، އެ ވާހަކަތަކަކީ، އޭނާ އެ ދާއިރާއަށް ކުރިމަތި ލެއްވުމުގެ މާކުރީއްސުރެ ފެށިގެން ފެންމަތި ވެފައިވާ ވާހަކަތަކެއް ކަމަށެވެ. އެއީ ހިސާން އެމްޑީޕީގެ ޕްރައިމަރީގައި ވާދަ ކުރައްވަން ނިންމެވި ހިސާބުން ފެށިގެން ވެސް ސޯޝަލް މީޑިއާގައި ފެތުރެމުން އައިސްފައިވާ ވާހަކަތަކެއް ކަމަށް، އަފީފް ވިދާޅުވިއެވެ.
"އަޅުގަނޑު މެލޭޝިޔާ ގައި ހުއްޓާ، މި އިންތިހާބަށް ކުރިމަތި ލުމުގެ މާކުރިން އެ ވާހަކަތައް ސޯޝަލް މީޑިއާގަ، ހިސާން ކުރިމަތި ލީ ހިސާބުން ފެށިގެން، ވާހަކަ އަކީ އެމްޑީޕީގެ ޕްރައިމަރީގަ ހިސާން ކުރިމަތި ލީ ހިސާބުން ފެށިގެން އެ ވާހަކަތައް ސޯޝަލް މީޑިއާ ގައި ފެތުރެން ފަށައިފި. އޭރު އަދި އިންތިހާބުގައި ކުރިމަތިލާން އަޅުގަނޑު ނިޔަތްވެސް ނުގަންނަން" އަފީފް ވިދާޅުވިއެވެ.
އަފީފް މިހެން ވިދާޅުވެފައި ވާއިރު، ތުހުމަތުތަކާ ގުޅިގެން، ހިސާންގެ ކެމްޕޭން ޓީމުގެ ފަރާތުން މިއަދު ނެރުނު ނޫސް ބަޔާނުގައި ބުނެފައި ވަނީ އެމްއާރްއެމްގެ ކެމްޕޭނު އޮފީހުގައި އިސްކޮށް ހަރަކާތްތެރިވާ ފަރާތްތަކަކުން ކޮށްފައިވާ ކަނޑައެޅިގެން ދޮގު ތުހުމަތުތަކެއް ކަމަށެވެ.
އަދި އެއީ އަފީފްގެ ކެމްޕޭން ޓީމުގެ ފާރަތުން، ހިސާން އަށް އެންޓި ކެމްޕޭން ކުރުމަށް ކޮށްފައިވާ ކެމްޕޭން ކުރުމުގެ އުސޫލާ ހިލާފު، ގާނޫނީ އިމުން ބޭރު އަމަލުތަކެއް ކަމަށްވެސް ހިސާންގެ ކެންޕޭން ޓީމުން ބުނެފައިވެއެވެ.
