މަޝްހޫރު ގާނޫނީ ވަކީލު އަދި ތުޅާދޫ ދާއިރާ އަށް އެމްޑީޕީގެ ފަރާތުން ވާދަ ކުރައްވާ ކެންޑިޑޭޓް ހިސާން ހުސައިން ދިރި އުޅުއްވާ ގެ މ.ނޫހިރީގައި، އަހަރު ތަކެއް ކުރީން ކިޔަވަން ތިބި ކުދިން ތަކަކަށް ލާއިންސާނީ އަނިޔާތަކެއް ކުރިމަތި ކުރުވި ކަމަށް ބުނެ ކޮށްފައިވާ ތުހުމަތު، އޭނާގެ ފަރާތުން ދޮގުކޮށްފިއެވެ.
ހިސާންގެ ކެމްޕޭން ޓީމުގެ ފަރާތުން ނެރުނު ނޫސް ބަޔާނު ގައި ބުނެފައި ވަނީ، އެ ތުހުމަތު ތަކަކީ، ބ.ތުޅަދޫ ދާއިރާއަށް ވާދަ ކުރައްވާ، މައުމޫން ރިޕޯމް މޫވްމަންޓު އިބްރާހިމް އަފީފް ގެ ކެމްޕޭނު އޮފީހުގައި އިސްކޮށް ހަރަކާތް ތެރި ވާ ފަރާތްތަކަކުން ކޮށްފައިވާ ކަނަޑައެޅިގެން ދޮގު ތުހުމަތު ތަކެއް ކަމަށެވެ. އަދި މިފަދަ މައްސަލަ އެއް އެއްވެސް އިރެއްގައި ފުލުހަށް ހުށައެޅިފާ ނުވާ ކަމަށް ވެސް ބުނެފައިވެއެވެ. އަދި ހިސާން އަކީ އެއްވެސް ބަޔަކާ މެދު އަނިޔާވެރި އަމަލެއް ހިންގާފައިވާ، އަދި ދުވަހަކުވެސް ހިންގާނެ ފަރާތެއް ނޫން ކަމަށާ، އޭނާ އަކީ އަބަދުވެސް އިންސާނީ ހައްގުތަކަށް ވަކާލާތު ކުރާ، އަދި މީހުންގެ ހައްގުތައް ރައްކާތެރި ކުރާ މީހެއް ކަމަށް ވެސް ބުނެފައި ވެއެވެ.
އަދި މި ބަޔާނުގައި، ރައީސް އިބްރާހިމް މުހައްމަދު ސޯލިހަށް ސިޓީ ލިޔެފައިވާ ފަރާތަކީ، އެމްއާރްއެމް ގެ ކެންޑިޑޭޓު އަފީފަށް ބޮޑުބޭބެ ކިޔާ މީހެއް ކަމަށް ބުނެފައިވެއެވެ. މީގެ އިތުރުން ހިސާން ގެ ކްމެޕޭން އޮފީހުން ވަނީ، ރަސްމީ އިދާރާއަކަށް، ދޮގު މައުލޫމާތު ހުށައަޅާފައިވާ މައްސަލަ ތަހުގީގު ކުރުމަށް، ފުލުހުންނަށް ގޮވާލާފައެވެ.
އޭރު އެގޭގައި ކިޔަވަން ތިބި ތިން ފިރިހެން ކުއްޖަކަށާ، ދެ އަންހެން ކުއްޖަކަށް އެކި ކަހަލަ ތުރާތައް ކުރިމަތި ކުރުވި ކަމަށް ބުނެ، ރައީސް ސޯލިހަށް ސިޓީ ހުށައަޅާފައި ވަނީ އޭރު ހިސާން ގެ ގޭގައި ކިޔަވަން ހުރި ބ.ތުޅާދޫ އަނަސް އަހްމަދެވެ.
އަނަސްގެ ސިޓީގައި، މ.ނޫހިރީގައި ކިޔަވަން ތިބި ކުދީން އުޅޭ ކޮޓަރިން، ފެނާ ކަރަންޓު ކަނޑާލުމުގެ އިތުރުން، ކޮޓަރީގެ ފެންލައިޓުން އެއް ފޫޓު ހުންނަވަރުގެ އެޅި ގަލެއް ކޮޓަރިއަށް އެއްލާފައި ވާކަމަށް ބުނެ ހިސާންގެ މައްޗަށް ތުހުމަތު ކޮށްފައިވެއެވެ. އަދި ކޮޓަރީގައި ނިދާފައި ތިއްބާ، 7 ފަހަރެއްގެ މަތީން ތަޅު ހަލާކު ކޮށްލާފައި ވާކަމަށް ވެސް އަނަސް ބުނެފައިވެއެވެ.
އަނަސް ބުނީ، ފެނާއި ކަރަންޓު ކަނޑާލި ދުވަސްވތަކުގައި ގައިން ތާހިރުވެ ހަދަން ޖެހުނީ، ޕަބްލިކް އިސްކުރުތަކުން، ފެން ގެނެސްގެން ކަމަށާއި، ކޮޓަރިއަށް އަލި ކުރަން ޖެހުނީ އުއްބައްތި ދިއްލައިގެން ކަމަށެވެ.
މިކަންތައްތަކުގެ ވާހަކަ އެންމެ ރަނގަޅަށް އެނގި ލައްވާނެ މީހަކީ ހިސާންގެ ބައްޕަ އައްޝައިޚް ހުސައިން ޔޫސުފް ކަމަށާ، އެކަން އެގޮތަށް ނުކުރުމަށް، އޭނާއަށް އޭނާގެ ބައްޕަ އެކި ފަހަރު މަތިން ނަސޭހަތްތެރި ވެފައި ވާކަމަށް ވެސް އަނަސް ގެ ސިޓީގައި ބުނެފައި ވެއެވެ. އެހެން ނަމަވެސް ހިސާން އެ އަޑު ނާއްސަވާ އެންމެ ފަހުން އެކުދީން އެގެއިން ނެރެ މަގުމަތި ކޮށްލީ ކަމަށް، އަނަސް ބުނެފައި ވެއެވެ.
އަނަސް ބުނީ، އެކަމާ ބެހޭ ހެކި ވެސް އޭނާ ހުށައަޅާނެ ކަމަށާ، މައްސަލަ އަކީ އޭރު ޕޮލިހަށް ވެސް ހުށައެޅި މައްސަލަ އެއް ކަމަށެވެ. އަދި މައްސަލައިގައި ހިސާން ގެ ހާޒިރުގާ ވެސް އެވާހަކަ ދައްކަން އޭނަ ހުރީ، ތައްޔާރަށް ކަމަށާއި އެކަމާ ގުޅުވައިގެން، ލަވައެއްވެސް ހަދާފައި ވާނެ ކަމަށްވެސް އަނަސް ބުނެފައިވެއެވެ.
މީގެ އިތުރުން އެމްޑީޕީ އަކީ އަބަދުވެސް ލާއިންސާނީ އަމަލުތަކާ، އިންސާނީ ކަރާމާތް ނަގާލަން މަސައްކަތް ކުރާ ފަރާތްތަކާ ދެކޮޅަށް އަޑު އުފުލާ ޕާޓީ އަކަށް ވީ ހިނދު، އެ ފަދަ އަމަލެއް ހިންގާފައިވާ ފަރާތަކަށް ޕާޓީން ފުރުސަތު ދިނުމަކީ ޕާޓީގެ އަސާސީ ގަވާއިދު ތަކާ ހިލާފު ކަމެއް ކަމަށް ވާތީ، ހިސާން އަށް އެމްޑީޕީން ކުރި ތާއިދު އަނބުރާ ގެންދަވާނެ ކަމަށް އުންމީދު ކުރާ ކަމަށް ސިޓީގައި އަނަސް ބުނެފައި ވެއެވެ.
މީގެ ދުވަސްކޮޅެއް ކުރިން އެމްޑީޕީން ވަނީ، ތިނަދޫ އުތުރު ދާއިރާއަށް ވާދަ ކުރައްވާ އެމްޑީޕީގެ ކެންޑިޑޭޓު އަބްދު ﷲ މުޣްނީގެ ކުރީގެ އަންހެނުން ކޮށްފައިވާ ގެވެށި އަނިޔާގެ ތުހުމަތަކާ ގުޅިގެން، އޭނާއަށް ކުރި ތާއީދު އަނބުރާ ގެންގޮސް ފައެވެ.
