އެސްއެމްއީ ބޭންކް: ކުޑަ އިންޓްރެސްޓްގައި ހަތަރު ޕްރޮޑަކްޓެއް!

ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ކުދި އަދި މެދުފަންތީގެ ވިޔަފާރިއަށް ހާއްސަކޮށްގެން އުފެއްދި އެސްއެމްއީ ބޭނުންކުން ތައާރަފް ކުރި ހަތަރު ޕްރޮޑަކްޓާއެކު ލޯނު ދޫކުރާނީ ހަ ޕަސެންޓްގެ އިންޓްރެސްޓްގައި ކަމަށް އެ ބޭންކުން ބުނެފިއެވެ.

އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން ޕްރައިވެޓް ލިމިޓެޑް (އެސްޑީއެފްސީ) އިން ބުނީ އެ ބޭންކުން ލޯނު ދޫކުރުމުގެ އިތުރުން ފަންނީ އެހީތެރިކަން ވެސް ދޭނެ ކަމަށެވެ. އެގޮތުން މިހާރު ހަތަރު ޕްރޮޑަކްޓެއް ދޫކުރަން ނިންމާފައިވާއިރު، ކުރިއަށް އޮތްތަނުގައި އިތުރު ލޯނު ޕްރޮޑަކްޓްތައް ދޭން ފަށާނެ ކަމަށް އެ ބޭންކުން ބުނެއެވެ. އެސްއެމްއީ ލޯނު ދޫކުރަނީ ރަށު ފަތުރުގެ ލޯނާއި، ވިޔަފާރި އެހީގެ ލޯނާއި، ދަނޑުވެރި ނަފާގެ ލޯނާއި، ހަރުމުދާ ލޯނު ކަމަށެވެ.

އެސްޑީއެފްސީން ފުރަތަމަ އަހަރު އެކަނި ވެސް 70 އާއި 100 މީހުންނަށް ލޯނު ދޫކުރާނެކަމަށް އެ ބޭންކުން ބުނެއެވެ.

ރަށު ފަތުރު - ގެސްޓް ހައުސް ވިޔަފާރިއަށް ހާއްސަ

ރަށު ފަތުރު ލޯން ތައާރަފްކުރުމުގެ މައިގަނޑު ބޭނުމަކީ ރާއްޖޭގެ އަތޮޅުތަކުގައި ފަތުރުވެރިކަން އިތުރަށް ތަރައްގީކޮށް، ކުދި އަދި މެދު ފަންތީގެ ވިޔަފާރީތަކަށް ފަތުރުވެރިކަމުގެ ދާއިރާއަށް ވަނުމުގެ މަގު ފަހި ކޮށްދިނުމެވެ. މީގެ ސަބަބުން އަލަށް ފަށާ ވިޔަފާރިތަކަށާއި ކުރިއަރަމުން އަންނަ ވިޔަފާރިތަކަށް ފަތުރުވެރިކަމުގެ ދާއިރާ އަދި މިދާއިރާއާއި ގުޅުންހުރި ވިޔަފާރިތަކަށް ވަނުމުގެ ފުރުސަތު އިތުރަށް ފުޅާކުރެވޭނެއެވެ.

މި ލޯނު ގެސްޓްހައުސް ވިޔަފާރި ފަށައިގަތުމަށާއި ގެސްޓްހައުސް ވިޔަފާރި ފަށައިގަތުން އަދި ހަދާ ނިމިފައިވާ ގެސްޓްހައުސްއެއް ގަތުމަށް އަދި ގެއެއް ގެސްޓްހައުސް އަކަށް ބަދަލުކުރުމާއި ގެސްޓްހައުސް ވިޔަފާރިއާއި ގުޅުންހުރި ވިޔަފާރިކުރުމަށް ކަންތައް ހިމެނެ އެވެ. މި ޕްރޮޑަކްޓްގެ ދަށުން 200,000 ރުފިޔާ އިން ފެށިގެން ފަސް މިލިއަން ރުފިޔާ އާއި ހަމައަށް ލޯނު ލިބޭނެއެވެ. އަދި އިންޓްރެސްޓް ރޭޓަކީ ހަ ޕަސެންޓެވެ. އަދި އަމިއްލައަށް އަމިއްލައަށް ހަރަދު ކުރަންޖެހޭނީ ޕްރޮޖެކްޓްގެ 20-15 ޕަސެންޓެވެ. އަދި އަނބުރާ ދައްކަން ހަތް އަހަރު ލިބޭ އިރު، ގްރޭސް ޕީރިއަޑުގެ ގޮތުގައި 18 މަސް ލިބޭނެއެވެ. މި ޕްރޮޑަކްޓު ނެގުމަށް ރަހުނުގެ ގޮތުގައި ގެދޮރާއި އެހެނިހެން މުދާ ގަބޫލު ކުރެއެވެ.

ވިޔަފާރި އެހީ

މި ޕްރޮޑަކްޓްގެެ މައިގަނޑު ބޭނުމަކީ ކުދި ވިޔަފާރިތަކަށް ކުރު މުއްދަތެއްގެ ތެރޭގައި ދަތިތަކާއި ނުލައި ބޭނުންވާ މާލީ އެހީ ފޯރުކޮށްދިނުމެވެ. މި ޕްރޮޑަކްޓްގެ ދަށުން ލިބޭ ލޯނުން މުދާ ގަތުމާއި ދުވަހުން ދުވަހަށް ބޭނުންވާ ވިޔަފާރީގެ ހަރަދުތައް ކުރެވޭ އިރު ޕްރޮޖެކްޓް އަދި ކޮންޓްރެކްޓް ފައިނޭންސް ކުރުމަށް ހޭދަ ކުރެވޭނެއެވެ. މި ޕްރޮޑަކްޓްގެ ދަށުން 500،000 ރުފިޔާ އާއި ހަމައަށް ލޯނުދޫކުރެއެވެ. މި ޕްރޮޑަކްޓްގެ އިންޓްރެސްޓަކީ އަހަރަކު 9.5 ޕަސެންޓެވެ. މި ޕްރޮޑަކްޓްގެ ދަށުން ލޯނު ނެގުމަށް ރަހުނުގެ ގޮތުގައި ގެދޮރާއި އެހެނިހެން މުދާ ގަބޫލުކުރާ އިރު، ލޯނު އަނބުރާ ދައްކަން ލިބޭނީ ގިނަވެގެން ދެ އަހަރެވެ.

ދަނޑުވެރި ނަފާ

މި ޕްރޮޑަކްޓްގެ ދަށުން ދޫކުރެވޭ ލޯނަކީ އެސްޑީއެފްސީ އާއި މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗާ ގުޅިގެން ރާއްޖޭގައި ދަނޑުވެރިކަން ކުރާ ފަރާތްތަކަށް އެހީތެރިވުމުގެ ގޮތުން އެކުލަވާލެވުނު ލޯނެކެވެ. މި ލޯނު ބޭނުން ކުރެވޭނީ ޓެކްނޮލޮޖީ ބޭނުންކޮށްގެން ޒަމާނީ ދަނޑުވެރިކަން ކުރުމަށް ނުވަތަ އާބަން އެގްރިކަލްޗާ، ގްރީން ހައުސް ފަދަ ޕްރޮޓެކްޓެޑް އެގްރިކަލްޗާ އަދި ވާޓިކަލް ދަނޑުވެރިކަންފަދަ ކަންތަކަށެވެ. މީގެ އިތުރުން ޕޯލްޓްރީ އަދި ދަނޑުވެރިކަމުގައި ގެންގުޅޭ ކުދި ޖަނަވާރު ގެންގުޅުން ހިމެނެ އެވެ. އަދި އެގްރޮފޮރަސްޓްރީ ނުވަތަ ގަހުގެ ނާސަރީތައް ގާއިމްކުރުމާއި ލިއު އެޑިޝަންގެ މަސައްކަތް ވެސް މި ޕްރޮޑަކްޓް ތެރޭގައި ހިމެނެއެވެ.

މި ލޯނު ރަހުނަކާއި ނުލާ 75،000 ރުފިޔާއާ ހަަމައަށް ލިބެއެވެ. އަދި އަމިއްލަ ފަރުދުންނަށް ގިނަވެގެން 500،000 ރުފިޔާގެ ލޯނު ނެގޭ އިރު، ކޯޕަރޭޓިވްސް އަދި ކުންފުނިތަކަށް ގިނަވެގެން ދެ މިލިއަން ރުފިޔާގެ ލޯނު ނެގެއެވެ. މި ލޯނުގެ އިންޓްރެސްޓަކީ ވެސް ހަ ޕަސެންޓެވެ. އަދި މި ލޯނަށް ވެސް ހަރަދު ކުރަން ޖެހޭނީ ޕްރޮޑަކްޓްގެ 15-20 ޕަސެންޓެވެ. ލޯނު ދައްކަން ހަތް އަހަރު ލިބޭ އިރު، ގްރޭސްޕީރިއަޑްއަކީ އެއް އަހަރު ދުވަހެވެ. އަދި ރަހުނުގެ ގޮތުގައި ގޯތިގެދޮރާއި އެހެނިހެން މުދާ ގަބޫލުކުރެވެއެވެ.

ހަރުމުދާ

އެސްޑީއެފްސީގެ 'ހަރުމުދާ' ލޯނުގެ މަގްސަދަކީ ކުދި އަދި މެދު ފަންތީގެ ވިޔަފާރިތައް ތަރައްގީކޮށް ކުރިޔަށް ގެންދިޔުމަށް ބޭނުންވާ ހަރުމުދާ ހޯދައިދިނުމަށް އެހީތެރިވެދިނުމެވެ. މި ލޯނު މެދުވެރިކޮށް މުދާ ގަތުމުގެ ފުރުސަތު ހުޅުވާލެވިފައިވަނީ އިމާރަތްކުރުން، މަސްވެރިކަން، އިންފޮމޭޝަން ކޮމިއުނިކޭޝަން ޓެކްނޮލޮޖީ އަދި އުފެއްދުންތެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށެވެ. މި ލޯނުން ވިޔަފާރިއަށް ބޭނުންވާ މެޝިނަރީ، އިކުއިޕްމަންޓް އަދި ވެހިކަލް ގަނެވޭނެއެވެ.

މި ޕްރޮޑަކްޓްގެ ދަށުން ލޯނުގެ ގޮތުގައި 100,000 ރުފިޔާއާއި ތިން މިލިއަން ރުފިޔާއާއި ދެމެދުގެ އަދަދެއް ދޫކުރެއެވެ. މި ލޯނުގެ އިންޓަރަސްޓް ރޭޓް އަހަރަކު ހަ ޕަސެންޓެވެ. އަދި އަމިއްލަ އަތުން ހަރަދު ކުރަންޖެހޭނީ ޕްރޮޖެކްޓްގެ 15 – 20 އިންސައްތައެވެ. މި ލޯނު އަނބުރާ ދެއްކުމަށް ގިނަވެގެން 6 އަހަރު، ގްރޭސް މުއްދަތުގެ ގޮތުގައި ގިނަވެގެން 1 އަހަރު ލިބެއެވެ. އަދި ރަހުނުގެ ގޮތުގައި ގޯތިގެދޮރާއި އެހެނިހެން މުދާ ގަބޫލުކުރެއެވެ.