މިދިޔަ އާދީއްތަ ދުވަހު ވެއްޓުނު އިތިއޮޕިއާ އެއާލައިންސް ފްލައިޓް އީޓީ 302 ގެ ކަޅުފޮށިން ލިބުނު މައުލޫމާތަށް ބަލާއިރު، މިދިޔަ އަހަރުގެ އޮކްޓޯބަރު މަހު، އިންޑޮނޭޝިއާގެ ޖާވާ ކަނޑަށް ލަޔަން އެއާގެ މަތިންދާބޯޓު ވެއްޓުނު ހާދިސާއާއި އެއްގޮތް ކަންތައްތަކެއް އެބަހުރި ކަމަށް އިތިއޮޕިއާގެ ޓްރާންސްޕޯޓް މިނިސްޓަރު ވިދާޅުވެއްޖެއެވެ.
މި ދެ މަތިންދާބޯޓަކީވެސް ބޮއިންގް 737 މެކްސް 8 މަރުކާގެ ދެ ބޯޓެވެ.
އިތިއޮޕިއާގެ އެޑިސް އަބަބާއިން ފުރައިގެން ކެންޏާގެ ނައިރޯބީއަށް ދަތުރުކުރަމުންދަނިކޮށް އީޓީ 302 ވެއްޓުނު ހާދިސާގައި، އެ ބޯޓުން ދަތުރުކުރި 157 މީހުން ވަނީ މަރުވެފައެވެ.
އިތިއޮޕިއާގެ ޓްރާންސްޕޯޓް މިނިސްޓާ ދަބްމަވިތު މޯގޭޒް ވިދާޅުވީ، މި ހާދިސާގެ ވަގުތީ ރިޕޯޓް، 30 ދުވަހުގެ ތެރޭގައި އާންމުކުރައްވާނެ ކަމަށެވެ.
ފްލައިޓް އީޓީ 302 އާއި ލަޔަން އެއާ ފްލައއިޓް 610އާއި ދެމެދު އެއްގޮތް ކަންތައްތަކެއް ފާހަގަކުރެވިފައިވާއިރު އެކަން އިތުރަށް ދިރާސާ ކުރައްވާ، ތަހުގީގުކުރައްވާނެ ކަމަށްވެސް ވަޒީރު ވަނީ ވިދާޅުވެފައެވެ.
ބޮއިންގް ކުންފުނީގެ ޗެއާމަން އަދި ސީއީއޯ ޑެނީސް މޫލެންބާގް ވަނީ، މި ތަހުގީގުތަކަށް، ބޮއިންގް ކުންފުނީގެ ފުރިހަމަ އެއްބާރުލުން ފޯރުކޮށްދޭނެކަން ކަށަވަރުކޮށްދެއްވާފައެވެ.
ވަކި ގޮތަކަށް ސަލާމަތީ ކަންކަން ކަށަވަރުކުރެވެދެން، ދުނިޔޭގެ ހުރިހާ ހިސާބެއްގައި އޮޕަރޭޓްކުރަމުންދާ ބޮއިންގް މެކްސް 8 މަރުކާގެ ހުރިހާ މަތިންދާބޯޓެއް މިހާރު ވަނީ ގްރައުންޑްކޮށްފައެވެ.
