އަންނަމަހު އޮންނަ މަޖިލިސް އިންތިހާބުގައި އަމިއްލަ ގޮތުން ވާދަކުރަން ނިންމި، ޕީޕީއެމް އަދި ޕީއެންސީ ހިމެނޭ ޕްރޮގްރެސިވް ކޯލިޝަންގެ ހަ މެންބަރަކާ މެދު ސްލޫކީ ކޮމިޓީން ފިވަޔަޅު އަޅަން ނިންމައިފިއެވެ.
ޕީއެންސީގެ ވަގުތީ ރައީސް އަބްދުއްރަހީމް އަބްދުﷲ ވިދާޅުވީ އަމިއްލަ ގޮތުން ވާދަކުރާ ޕްރޮގްރެސިވް ކޯލިޝަންގެ މެންބަރުންގެ މައްސަލަތައް ސުލޫކީ ކޮމިޓީއަށް ހުށަހެޅި ބަލާ ނިމިފައިވާ ކަމަށެވެ. އަދި އެފަރާތްތަކާ މެދު ފިޔަވަޅު އަޅަން ނިންމާފައިވާ ކަމަށް ވެސް އަބްދުއްރަހީމް ވިދާޅުވިއެވެ.
"އަޅުގަނޑުމެންނާ ހަމައަށް އަދި ނިންމުމެއް ނާދޭ. އެކަމަކު އަޅުގަނޑަށް މައުލޫމާތު ލިބިފައިވާ ގޮތުގައި ކޮމެޓީން މިހާރު ވަނީ ހަ ބޭފުޅަކާ ދޭތެރޭ ފިޔަވަޅު އެޅުމަށް ނިންމާފައި" އަބްދުއްރަހީމް ވިދާޅުވިއެވެ.
ސުލޫކީ ކޮމިޓީން އަޅަން ނިންމީ ކޮން ފިޔަވަޅުތަކެއް އަބްދުއްރަހީމް ހާމައެއް ނުކުރައްވައެވެ. ނަމަވެސް، ސުލޫކީ ކޮމެޓީން އަޅާ ފިޔަވަޅުތައް އެ ކޮމެޓީން ހާމަކުރާނެ ކަމަށް އޭނާ ވިދާޅުވިއެވެ.
ޕީޕީއެމްގެ ރައީސްގެ ފިކުރަށް މީގެ ކުރިން ތާއިދުކުރި މީހުން ޔާމީންގެ ނަމުގައި މަޖިލީހަށް ވާދަކުރަން ނުކުމެ ކެމްޕޭން ކުރަމުން ދާކަމަށް ޕްރޮގްރެސިވް ކޯލިޝަނުން ވަނީ ބުނެފައެވެ. އަދި އެކަން އެ ކޯލިޝަނުން ވަނީ ކުށްވެރި ކޮށްފައެވެ.
ޕްރޮގްރެސިވް ކޯލިޝަނުން އެ ކޯލިޝަންގެ މެންބަރުންނާ މެދު ފިޔަވަޅު އަޅަން ނިންމާފައި ވާއިރު، މީގެ ކުރިން އެ ކޯލިޝަނުން ޖޭޕީއާއި ގުޅިގެން މަޖިލިސް އިންތިހާބުގައި ކުރިއަށްދާން ނިންމިކަން ހާމަކޮށް، ޖޭޕީން ވާދަކުރާ ބައެއް ދާއިރާތައް ދޫކޮށްލާނެ ކަމަށް ވަނީ ބުނެފައެވެ. އަދި އެ ދާއިރާތަކަށް ޓިކެޓް ދިން ކެންޑިޑޭޓުން އަމިއްލައަށް ވާދަ ކުރެވޭނެ ކަމަށް މީގެ ކުރިން ބުނެފައި ވެއެވެ.
