އަންނަ އެޕްރީމް މަހުގެ 6 ވަނަ ދުވަހު ބާއްވާ ރައްޔިތުންގެ މަޖިލީސް އިންތިހާބުގައި ބޭނުންކުރާނެ ވޯޓު ކަރުދާސް ޗާޕްކޮށްދޭނޭ ބަޔަކު ހޯދުމަށް އިލެކްޝަންސް ކޮމިޝަނުން އިއުލާންކޮށްފިއެވެ.
މަޖިލިސް އިންތިހާބުގެ ވޯޓުކަރުދާސް ޕްރިންޓު ކުރުމުގެ މަސައްކަތް ކުރުމަށް ޝައުގުވެރިވާ ކުންފުނިތަަކަށް މައުލޫމާތު ދިނުން އަންނަ ހޯމަ ދުވަހުގެ 14:00 ގައި އިލެކްޝަންސް ކޮމިޝަނުގައި އޮންނާނެ ކަމަށް އެ ކޮމިޝަނުން ކުރި އިއުލާނެއްގައި ބުނުފައިވެއެވެ.
އަދި އަންދާސީ ހިސާބު ހުށަހަޅަންޖެހެނީ މާޗު 10 ވަނަ ދުވަހުގެ 14:00 އަށް އިލެކްޝަންސް ކޮމިޝަނަށެވެ. ބީލަން ހުޅުވުން އޮންނާނީވެސް ހަމަ އެދުވަހުގެ އެ ގަޑީގައެވެ. މައުލޫމާތު ދިނުމުގެ ބައްދަލުވުމަށް ހާޒިރު ނުވާ ފަރާތްތަކުގެ ބީލަން ބަލައި ނުގަންނާނެ ކަމަށް އީސީން ބުނެފައިވެއެވެ.
މަޖިލިސް އިންތިހާބުގެ ވޯޓު ކަރުދާހާ ގުޅޭގޮތުން އީސީން ބުނެފައިވަނީ ވޯޓު ކަރުދާހުގައިވާ ސެކިއުރިޓީ ފީޗާގެ އިތުރުން، އިތުރު ޔަގީންކުރުމެއް ހިމެނުމަށްޓަކައި ކޮންމެ ވޯޓު ކަރުދާހެއްގައި އިލެކްޝަންސްގެ ތައްގަނޑެއް ޖަހާނެ ކަމަށެވެ.
މި ތައްގަނޑު ޖެހުމުގެ ބޭނުމަކީ ވޯޓު ފޮއްޓަށް ލާ ވޯޓު ކަރުދާހަކީ ސައްހަ ވޯޓު ކަރުދާހެއްކަން، ވޯޓު ފޮށި ބަލަހައްޓާ މީހާއަށް ފަސޭހައިން ޔަގީންވާނެ ގޮތެއް ހެދުން ކަމަށް އެ ކޮމިޝަނުގެ ރައީސް އަހުމަދު ޝަރީފް ވަނީ ވިދާޅުވެފައެވެ.
ވޯޓު ކަރުދާސް ޗާޕްކުރުމުގެ މަސައްކަތް ކުރާ ތަނާއި ސެކިއުރިޓީ ރޫމުގައި ވޯޓު ކަރުދާސްތައް ބަހައްޓާ އިރު ފުލުހުން ސެކިއުރިޓީ ބަލަހައްޓާނެ ކަމަށް އީސީން ވަނީ ބުނެފައެވެ.
ނިމިދިޔަ ރިޔާސީ އިންތިހާބުގައި ވޯޓު ލުމަށް ބޭނުންކުރި ވޯޓު ކަރުދާހުގައި ޖަހާ ފަހަގަ ފޮހެވުނު ވާހަކައާއި ޖަހާ ފާހަގަ ތިރިއަށް ފޭބި ވާހަކަ ދެކެވުނެވެ. ނަމަވެސް ވޯޓު ކަރުދާސްތައް ނައްތާލުމުގެ ކުރިން އިލެކްޝަންސް އިން ވަނީ ކަރުދާސްތައް ނޫސްވެރިންނަށް ދައްކާލައިފައެވެ. ވޯޓު ކަރުދާހުގައި އުޅޭކަމަށް ބުނި އެއްވެސް ކަމެއް އޭރު ފާހަގައެއް ނުވެއެވެ.
