އިންޑިއާއިން ބޭނުންނަމަ ރާއްޖެ ހިފިދާނެކަމަށް އިންޑިއާގެ ނޫހަކަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވި މައްސަލައިގައި މާދަމާ އޮންނަ މަޖިލީހުގެ ޖަލްސާއަށް އޭނާ ހާޒިރުކުރަން ނިންމައިފިއެވެ.
މިއީ ރައީސް އިބްރާހީމް މުހައްމަދު ސޯލިހުގެ ކެބިނެޓް މިނިސްޓަރަކު މަޖިލީހަށް ހާޒިރު ކުރެވޭ ފުރަތަމަ ފަހަރެވެ. މާރިޔާ މަޖިލީހަށް ހާޒިރު ކުރައްވަނީ ވަޒީރުންނާ ސުވާލުކުރުމަށް މެންބަރުންނަށް ލިބިފައިވާ ބާރުގެ ދަށުން، މަހިބަދޫ ދާއިރާގެ ޕީޕީއެމް މެންބަރު އަހުމަދު ތޯރިހު ހުށަހެޅުއްވި މައްސަލައިގައެވެ.
މާދަމާގެ ޖަލްސާގެ އެޖެންޑާ އަދި މަޖިލީހުގެ އިދާރާއިން އާންމުކޮށްފައެއް ނުވެއެވެ. ނަމަވެސް މާދަމާ އޮންނަ ޖަލްސާއަށް ހާޒިރުވެވަޑައިގަތުމަށް މާރިޔާއަށް ނޯޓިސް ވަނީ ފޮނުއްވާފައެވެ. އަދި މާދަމާގެ އެޖެންޑާގައި މާރިޔާއާއި ސުވާލުކުރެއްވުމުގެ ބައި ވެސް ވަނީ ހިމަނާފައެވެ.
ތޯރިގު ހުށަހެޅުއްވި މައްސަލައިގައި ބުނެފައިވަނީ ގާނޫނުއަސާސީއާއި ސިފައިންގެ ގާނޫނުން ވަޒީރާ މަތިކޮށްފައިވާ ގާނޫނީ އެންމެ ބޮޑެތި ޒިންމާތަކުގެ ތެރޭގައި ރާއްޖޭގެ މިނިވަންކަމާއި ސިޔާދަތު ދިފާއުކޮށް ހިމާޔަތްކުރުން ހިމެނޭ ކަަމަށެވެ. އަދި ރާއްޖޭގެ އިއްޒަތާއި ކަރާމާތާއި ދައުލަތިގެ ޝާނާއި ޝައުކަތު ދައްކުވައިދީ ހިފެހެއްޓުމާއި ރާއްޖޭގެ ކަނޑާއި އިގްތިސާދީ ސަރަހައްދު ހިމާޔަތްކުރުމުގެ ސިޔާސަތު ކަނޑައެޅުމަކީ ގާނޫނުއަސާސީއާ ސިފައިންގެ ގާނޫނުން ވަޒީރާ ހަވާލުކޮށްފައިވާ ޒިންމާއެއް ކަަމަށް ތޯރިގު ހުށަހެޅުއްވި މައްސަލައިގަ ބުނެފައިވެއެވެ.
އިންޑިއާގެ ނޫހެއް ކަމަށްވާ ސްޓްރެޓެޖިކް ނިއުސް އިންޓަނޭޝަނަލް (އެސްއެންއައި) އަށް ދެއްވި އިންޓަވިއުއާއި ގުޅިގެން، މާރިޔާގެ އިތުބާރު ނެތްކަމުގެ މައްސަލައެއް އިދިކޮޅުން މަޖިލީހަށް ވައްދަން ނިންމާފައިވެއެވެ. ނަމަވެސް، އެ މައްސަލަ ވެއްދުމަށް ބޭނުންވާ ވަރަށް މެންބަރުންގެ ސޮއި ހަމަނުވެއެވެ.
