ރައީސް އިބްރާހީމް މުހައްމަދު ސޯލިހު އުފައްދަވާފައިވާ ރިޔާސީ ކޮމިޝަންތަކުގެ ބިލަށް ތާއިދު ނުކުރައްވަނީ، އިދިކޮޅުން މަޖިލީހަށް ކުރިމަތިލާފައިވާ ކެންޑިޑޭޓުންނަށް ހައްޔަރުކޮށްފާނެތީ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
މަރާލެވިފައިވާ މީހުންނާއި ގެއްލުވާލާފައިވާ މީހުންގެ ރިޔާސީ ކޮމިޝަނަށާއި، ކޮރަޕްޝަންގެ މައްސަލަތައް ބަލަން އުފެއްދި ރިޔާސީ ކޮމިޝަނަށް ބާރުލިބޭގޮތަށް މަޖިލީހަށް ހުށަހަޅާފައިވާ ބިލަށް ދެ ފަހަރެއްގެ މަތިން ވޯޓަށް އެހި އިރު، މަޖިލީހުގައި ގާނޫނީ އަދަދަށް މެންބަރުން ހަމަ ނުވެގެން ބިލަށް ވޯޓަށް އެހިފައި ނުވެއެވެ. އިއްޔެ ބޭއްވި މަޖިލީހުގެ ޖަލްސާގައި ވެސް ގާނޫނީ އަދަދަށް 43 މެންބަރުން ހަމަ ނުވެގެން ބިލަށް ވޯޓަށް ނޭހި މަޖިލިސް ވަނީ ނިންމާލާފައެވެ.
މިދިޔަ އަަހަރުގެ މަޖިލީހުގެ ފަހު ދައުރުގެ ފަހު ޖަލްސާގައި އިދިކޮޅު މެންބަރުން ވަނީ ކޮމިޝަންތަކުގެ ބިލަށް ވޯޓަށް އަހަން އޮތް ދުވަހު މަޖިލިސް ބޮއިކޮޓް ކޮށްފައެވެ. އަދި މި ބިލަށް ތާއިދު ނުކުރާ ކަމަށް އިދިކޮޅު ޕްރޮގްރެސިވް ކޯލިޝަނުން ވަނީ ބުނެފައެވެ.
ޕީއެންސީ ބޭއްވި ނޫސްވެރިންގެ ބައްދަލުވުމުގައި އަބްދުއް ރަހީމް ވިދާޅުވީ "ކޮމިޝަންތަކަށް ބާރުދޭން އުޅޭނީ ކެންޑިޑޭޓުން ޖަލަށްލުމަށް" ކަމަށެވެ. އަދި އަވަސް އަރުވާލައިގެން ކޮމިޝަންތަކަށް ބާރުދޭން ސަރުކާރުން މަސައްކަތް ކުރައްވަނީ، މަޖިލިސް މެޖޯރިޓީ ނެގުމަށް، އިދިކޮޅު ކޯލިޝަންގެ މަޖިލިސް އިންތިހާބުގެ ކެންޑިޑޭޓުން ޖަލަށް ލުމަށް ކަމަށެވެ.
"އެބޭފުޅުން އެ އުޅެނީ، ރައްޔިތުންގެ މަޖިލީހުގެ އިންތިހާބު ބޭއްވުމުގެ ކުރިން [ކޮމިޝަންތަކަށް] ބާރު ހޯދަންވެގެން. ހޯދުމަށްފަހު، އެބޭފުޅުންނަށް މެޖޯރިޓީ ލިބޭ ވަރަށް. މިސާލަކަށް ގުރުއަތުލާ ނިމުމުން [ކެންޑިޑޭޓު ނަންބަރު ތަރުތީބުކުރުމަށްފަހު] މުހައްމަދު ސައީދު [މާވަށު ދާއިރާއަށް ވާދަކުރައްވާ ކުރީގެ އިކޮނޮމިކް މިނިސްޓަރު] ގެންގޮސް ހައްޔަރު ކުރަންވީ. އެމްޑީޕީ ކެންޑިޑޭޓު ފިޔަވާ އެ ދާއިރާގައި ވާދަކުރައްވަން ހުންނަވާ ކެންޑިޑޭޓުން ހައްޔަރުކުރުމުން އެމްޑީޕީއަށް ގޮނޑި ލިބުނީ. ފަސޭހަ ނޫންތޯ؟" އަބްދުއްރަހީމް ވިދާޅުވިއެވެ.
އޭނާ ވިދާޅުވީ 100 ފަހަރު ބިލް އެޖެންޑާ ކުރިނަމަވެސް އެބިލަށް އިދިކޮޅު ކޯލިޝަނުން ތާއިދު ނުކުރައްވާނެ ކަމަށެވެ. އޭނާ ވިދާޅުވީ ކޮރަޕްޝަންގެ މައްސަލަތައް ބެލުމަށް ގާނުނީ ގޮތުން މުއައްސަސާތަައް އުފައްދަވާފައިވާ ކަމަށާއި، ރައީސް ބޭނުންފުޅުވާ ބޭފުޅުން އައްޔަން ކޮށްގެން ރިޔާސީ ކޮމިޝަންތަކަށް ބާރު ދިނުމަކީ ގަބޫލުކުރެއްވޭނެ ކަމެއް ނޫން ކަމަށެވެ.
"ކޮރަޕްޝަނާއި ފަސާދައިގެ އަމަލުތައް އޭސީސީން ބެލޭނެ. ޖިނާއީ ތަހުގީގުތައް ފުލުހުންނަށް ކުރެވޭނެ. މިފަދަ މުއަސަސާތައް އުފައްދަވާފައި ވަނިކޮށް، އެ މުއައްސަސާތަކުން ގާނޫނު އަސާސީން މެންޑޭޓު ކަނޑައަޅާފައި ވަނިކޮށް، ދެން ރައީސަކަށް އަންނަ ބޭފުޅަކު ބޭނުންވާ ބޭފުޅަކު ލައިގެން އުފައްދަވާ ކޮމިޝަނަކަށް ބާރުދިނުމަކީ އަޅުގަނޑުމެން ގަބޫލުކުރާ ހަމައެއް ނޫން. އަދި ގާނޫނު އަސާސީއާ އެއްގޮތަށް ކުރާ ކަމެއް ނޫން" އަބްދުއްރަހީމް ވިދާޅުވިއެވެ.
އޭނާ ވިދާޅުވީ ކޮމިޝަންތައް ރައީސަށް އުފެއްދެވިދާނެ ކަމަށާއި، ނަމަވެސް އެ ކޮމިޝަންތަކުން ބެއްލެވިދާނެ ކަމަށާއި، އެ މައްސަލަތައް ބެއްލެވުމަށްފަހު އެކަމަށް ފިޔަވަޅު އަޅާނީ އެކަމާ ބެހޭ މުއައްސަސާތަކުން ކަމަށެވެ.
"އެ ވިދާޅުވާ، ބަރުލަމާނީ ނިޒާމަށް މި ރާއްޖެ ބަދަލުކުރުމަށް ބޭނުންވާ ވަރަށް، އަގުލަބިއްޔަތު ހޯދެނީ، އަޅުގަނޑުމެންގެ ތެރެއިން 30-40 އަކަށް މެމްބަރުން ހައްޔަރުކޮށްގެން ކަމަށް ވާނަމަ، އެކަން ކުރަން މަގުފަހިކުރުމަށްޓަކައި ކޮމިޝަންތަކަށް ބާރުދޭން އުޅެނީ" އަބްދުއްރަހީމް ވިދާޅުވިއެވެ.
އިދިކޮޅު މެންބަރުން މި ބިލާ ދެކޮޅު ހަދަމުން ދަނީ، އެބޭފުޅުންގެ ނަޒާހަތްތެރިކަން ނެތުމުން ކަމަށް ކޯލިޝަންގެ މެންބަރުން ދަނީ ބުނަމުންނެވެ. އަދި މި ބިލު ފާސްވިޔަ ނުދިނުމަށް މަސައްކަތް ކުރަނީ އިދިކޮޅު ކޯލިޝަންގެ މެންބަރުން އެފަދަ ކަންކަން ކުރައްވާފައިވާތީ ކަމަށެވެ.
