މެންބަރުން ހަމަނުވެގެން ރިޔާސީ ކޮމިޝަންތަކުގެ ބިލަށް މިއަދުވެސް ވޯޓަށް ނާހާ މަޖިލިސް ނިންމާލައިފިއެވެ.
ދައުލަތުގެ ފައިސާއާއި މުދަލަށް ހިޔާނާތްތެރިވުމުގެ މައްސަލަތަކާއި ގޮތްނޭނގޭ މަރުގެ މައްސަލަތައް ބެލުމަށް ރައީސް އިބްރާހީމް މުހައްމަދު ސޯލިހު އުފައްދަވާފައިވާ ރިޔާސީ ކޮމިޝަންތަކަށް ބާރުލިބޭގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލަށް، ގާނޫނީ އަދަދު ހަމަނުވެގެން މިއަދު ވެސް ވޯޓު ނާހާ މަޖިލިސް ނިންމާލައިފިއެވެ.
ރިޔާސަތުން ރިޔާސީ ކޮމިޝަނަށް ބާރު ލިބޭ ބިލަށް ވޯޓަށް އެއްސެވި އިރު، މަޖިލީހުގައި ގާނޫނީ އަދަދު 43 މެންބަރުން ހަމަނުވާތީ އެ ބިލަށް ވޯޓަށް ނޭއްސެވޭނެކަމަށް ވިދާޅުވެ ރިޔާސަތުން ވަނީ މަޖިލިސް ނިންމާލައްވައިފައެވެ. ނިމިގެން ދިޔަ މަޖިލީހުގެ ފަހު ދައުރުގައި ވެސް މި ބިލަށް ވޯޓާ ނޭހި މަޖިލިހުގެ ދައުރު ނިންމާ މަޖިލިސް ޗުއްޓީއަށް ދިޔައީ 43 މެންބަރުން ހަމަނުވެގެންނެވެ. މި ބިލުގައި ރައްޔިތުން އެ މައްޗަށް އަމަލު ކުރުން ލާޒިމް ކަންކަން ހުރުމުން، މި ބިލަށް ވޯޓަށް އެހޭނީ މަޖިލީހުގެ ދެބައިކުޅަ އެއްބައި މެންބަރުން ހާޒިރުވެ ތިބެގެންނެވެ. ނަަމަވެސް މި ބިލަށް ވޯޓަށް އެހި އިރު އެ އަދަދު މަޖިލީހުގައި ހަމަނުވުމުން، މަޖިލީހުގެ މިއަދުގެ ޖަލްސާ ވެސް ވަނީ ނިންމާލާފައެވެ.
އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިން ހުށަހެޅުއްވި މި ބިލާއި ގުޅިގެން އިދިކޮޅު މެންބަރުން މަޖިލީހުގެ މިދިޔަ އަހަރުގެ ފަހު ދައުރުގެ ޖަލްސާތަކުގައި މަޖިލީހުގެ ތަޅުމުގައި އިހުތިޖާޖު ކުރިއެވެ. އަދި މި ބިލުގައި ގާނޫނުއަސާސީ އާއި މިހާރު ހުރި ގާނޫނުތަކާ ފުށުއަރާ ބައިތައް ބިލުގައި ހުރި ކަމަށް ބުނެ، އިދިކޮޅު ފަރާތްތަކުން މި ބިލަށް ވަރަށް ބޮޑަށް ފާޑުކިއެވެ.
ބިލާމެދު ބައެއް ފަރާތްތަކުގެ ކަންބޮޑުވުންތަކާހެދި ރިޔާސީ ކޮމިޝަނަށް ބާރުލިބޭ ބިލް މިނިވަން މުއައްސަސާތަކާއި ބެހޭ ކޮމިޓީއަށް ފޮނުވައި އެ ބިލަށް ބޮޑެތި ބަދަލުތަކެއް ވަނީ ގެނެސްފައެވެ. އަދި ކޮމިޝަނަށް ބާރުލިބޭ ބައެއް މާއްދާތައް ބިލުން އުނިކޮށްފައިވެެއެވެ.
