ޕާޓީތަކުގެ ޕްރައިމަރީ އިން ބަލިވާ ފަރާތްތަކަށް ރައްޔިތުން މަޖިލީހުގެ އިންތިހާބުގައި ވާދަކުރެވޭނެކަމަށާއި، އަންނަ މަހުގެ ހަތަރު ވަނަ ދުވަހާ ހަމައަށް މަޖިލިސް އިންތިހާބަށް ކުރިމަތިލެވޭގޮތަށް ފުރުސަތު ހުޅުވާލުމަށް އިލެކްޝަންސް ކޮމިޝަންގެ މައްޗަށް ސުޕްރީމް ކޯޓުން ދެންމެއަކު ހުކުމް ކޮށްފިއެވެ.
ސުޕްރީމް ކޯޓުން ކުރި ހުކުމްގައި ބުނެފައިވަނީ އިންތިހާބުތަކާ ބެހޭ ގާނޫނުގައި އޮންނަ މާއްދާ ބާތިލްކޮށް އެފަދަ ފަރާތްތަކަށް މަޖިލިސް އިންތިހާބުގައި ވާދަކުރެވޭނެ ކަމަށެވެ. އަދި އެ ފަރާތްތަކަށް އެފުރުސަތު ފަހިކޮށްދިނުމުގެ ގޮތުން މަޖިލިސް އިންތިހާބަށް ކުރިމަތިލުމުގެ މުއްދަތު އަންނަ މަހުގެ ހަތަރު ވަނަ ދުވަހާ ހަމައަށް ހުޅުވާލުމަށް ސުޕްރީމް ކޯޓުގެ ހުކުމްގައި ބުނެފައިވެއެވެ.
ޕްރައިމަރީން ބަލިވިޔަސް އިންތިހާބުގައި ވާދަކުރެވޭނެކަމަށް ކަނޑައަޅައި ދިނުމަށް އެދި މި މައްސަލަ ސުޕްރީމް ކޯޓަށް ހުށަހެޅުއްވީ އެމްޑީޕީގެ ޕްރައިމަރީގައި، ނާކާމިޔާބުވި ރައީސް އިބްރާޙީމް މުހައްމަދު ސޯލިހުގެ އެންވޯއީ އަބްދުﷲ ޖާބިރެވެ. ޖާބިރުގެ އިތުރުން ވަކީލް އަބްދުލްމާނިއު ހުސައިނާއި ސ. ހިތަދޫ ގުލްހަޒާރުގޭ އަހުމަދު މުހައްމަދު ވެސް މި މައްސަލަ ހުށަހަޅާފައިވެއެވެ.
ސުޕްރީމް ކޯޓުން މިއަދު ކުރި ހުކުމްގައި ބުނެފައިވަނީ ޕްރައިމަރީގައި ވާދަކޮށް ބަލިވާ ކެންޑިޑޭޓުންނަށް އެއްވެސް ހައިސިއްޔަތަކުން އިންތިހާބުގައި ވާދަ ނުކުރެވޭގޮތަށް އޮތުމަކީ ގާނޫނު އަސާސީން ކަށަވަރުކޮށްދޭ އިންތިހާބުގައި ވާދަކުރުމުގެ އަސާސީ ހައްގުންމަހުރޫމްވާ ކަމެއް ކަމަށާއި، އެއީ ގާނޫނު އަސާސީގެ ސިފައެއް ނޫން ކަމަށެވެ.
