މަސްވެރި އާއިލާތަކުގެ ލުއިފަސޭހައަށްޓަކައި، ސަރުކާރުން ތައާރަފު ކުރި "މަސްދޯނި އެކައުންޓް" ގެ ބޭނުން ހިފައި، މަސްވެރިން ކިރުވާ މަހަށް ވަގުތުން ފައިސާ ދޭން ފެށުމަށް މަސްވެރި ކުންފުނިތަކަށް ރައީސް އިބްރާހީމް މުހައްމަދު ސޯލިހު އިލްތިމާސް ކުރައްވައިފިއެވެ.
އެމަނިކުފާނު މިކަމަށް އިލްތިމާސް ކުރެއްވީ، ބޭންކް އޮފް މޯލްޑިވްސް އާއި މިނިސްޓްރީ އޮފް ފިޝަރީޒް ގުޅިގެން ތައާރަފު ކުރި "މަސްދޯނި އެކައުންޓް" އިފްތިތާހު ކުރެއްވުމަށް ރޭ ހުވަދުއަތޮޅު އުތުރުބުރީ ކޫއްޑޫގައި ބޭއްވި ރަސްމިއްޔާތުގައެވެ.
ރައީސް ވިދާޅުވީ ދިވެރާއްޖެއަކީ އެންމެ އިހުއްސުރެ، މަސްވެރިކަން ކޮށްގެން ދިރިއުޅުން ކޮޅަށް ޖަހަމުން އައި، މަސްވެރިން އުޅޭ މަސްވެރި ގަައުމެއްކަމަށެވެ. އަދި، ދިވެހީންނަށް ވާރުތަވަމުން އައިސްފައިވާ މަސްވެރިކަން ތަރައްގީކޮށް ކުރިއެރުވުމަކީ މި ސަރުކާރުން ވަރަށް ބޮޑަށް އިސްކަންދޭ ކަމެއް ކަމުގައިވެސް އެމަނިކުފާނު ވިދާޅުވިއެވެ.
މިރޮނގުން ވާހަކަފުޅު ދައްކަވަމުން، ޒަމާނީ ޓެކްނޮލޮޖީއާއި، އިގްތިސާދާއި ދުނިޔޭގެ ތިމާވެއްޓަށް އަންނަ ބަދަލުތަކާއެކު، މަސްވެރިކަން، އައު ޖީލަކަށް ގެންގޮސްދިނުމަކީ ސަރުކާރުގެ މުހިންމު އަމާޒެއް ކަމުގައި ރައީސް ވިދާޅުވިއެވެ. މިގޮތުން، ރާއްޖެ ތަރައްގީކުރުމުގެ މަސައްކަތުގެ ތެރެއިން، ގައުމުގެ އިގްތިސާދުގައި މަސްވެރިކަމުގެ ހިއްސާ ބޮޑުކޮށް، މަސްވެރިކަމަކީ ފަހުރުވެރި މަސައްކަތަކަށް ހެދުމަށް ސަރުކާރުން ގިނަ މަސައްކަތްތަކެއް ކުރަމުން ގެންދަވާކަން ރައީސް ފާހަގަ ކުރެއްވިއެވެ.
އަދި، މަސްވެރިކަމުގެ ސިނާއަތް ކުރިއަރުވައި ތަރައްގީ ކުރުމުގެ މަސްއޫލިއްޔަތު، ސަރުކާރާއި، މަސްވެރީންނާއި، މަސްވެރީންނަށް ހިދުމަތްދޭ ކުންފުނިތައް އެކުގައި އުފުލަންޖެހޭ ކަމުގައިވެސް ރައީސް ވިދާޅުވިއެވެ.
އެމަނިކުފާނު ވިދާޅުވީ ހަގީގީ ތަރައްގީ ފެންނަން ފަށާނީ ރައްޔިތު މީހާގެ ޖީބަށް ވަންނަ ފައިސާ އިތުރުކޮށްދީގެން ކަމަށާއި، އެ އަމާޒަށް އެކުގައި މަސައްކަތް ކުރުމަށް އެންމެންގެ ކިބައިން ރައީސް އެދިވަޑައިގެންނެވިއެވެ. އަދި، ސަރުކާރުގެ އަމާޒަކީ ގައުމީ އާމްދަނީން ބޮލަކަށް ޖެހޭ މިންވަރު އިތުރުކުރުން އެކަނި ނޫން ކަމަށާއި، އެއާއެކު ގައުމީ އާމްދަނީން ރައްޔިތު މީހާގެ ޖީބަށް ވަންނަ މިންވަރުވެސް އިތުރުކޮށްދިނުން ކަމުގައި ރައީސް ވިދާޅުވިއެވެ.
