ރާއްޖެއަށް އެތެރެކުރަން އުޅުނު ޕާޓީ ޑުރަގް ކަސްޓަމްސް އިން އަތުލައިގެންފިއެވެ. މައުލޫމާތު ލިބޭ ގޮތުގައި އަތުލައިގެންފައި ވަނީ ޕާޓީ ޑްރަގުގެ އެމްޑީއެމްއޭ (އެކްސްޓަސީ) 71 ގުޅަ (27 ގްރާމް) އާއި 10 އެލްއެސްޑީ 10 ސްޓިކާއެވެ.
ކަސްޓަމްސް އިން ހާމަކޮށްފައިވާ ގޮތުގައި މިތަކެއްޗަކީ ވައިގެ މަގުން ނެދަލެންޑުން ގެނެސްފައިވާ ތަކެއްޗެވެ.
ކަސްޓަމްސް އިން އަތުލި ޕާރުސަލްތަކުގެ ތެރެއިން އެއްޕާރުސަލުގައި ހިމެނެނީ އެކްސްޓަސީ ގެ 50 ގުޅަ (14 ގުރާމް) އަދި އެލްއެސްޑީ ކަމަށް ޝައްކުކުރެވޭ 10 ސްޓިކާއެވެ. ދެވަަނަ ޕާރުސަލުގައި އެކްސްޓަސީ ގެ 21 ގުޅަ (10 ގުރާމް) އަދި ތިންވަނަ ޕާރުސަލުގައި އެކްސްޓަސީގެ 19 ގްރާމް ހިމެނޭ ކަމަށް ކަސްޓަމްސް އިން ބުނެއެވެ.
މިމައްސަލަތަކުގައި އަތުލައިގެންފައިވާ މަސްތުވާތަކެތި މިހާރު ވަނީ އިތުރަށް ތަޙްޤީޤު ކުރުމަށްޓަކައި މޯލްޑިވްސް ޕޮލިސް ސަރވިސްއާ ހަވާލުކޮށްފައި ކަމަށްވެސް ކަސްޓމްސް އިން މިއަދު އާންމު ކުރި ބަޔާނުގައި ވެއެވެ. މިހާދިސާއާއި ގުޅިގެން މީހަކު ނުވަތަ ބަޔަކު ހައްޔަރު ކުރިކަމެއް ނުވަތަ ނުކުރާ ކަމެއް ފުލުހުން ހާމަ ކޮށްފައެއް ނެތެވެ.
