ވޭތުވެދިޔަ ހަފުތާގައި ރާއްޖޭގެ އެކި ސަރަހައްދުތަކުގައި ހިނގި ކުއްލި ނުރައްކާތަކުގެ، 16 ހާދިސާއަކަށް އެމްއެންޑީއެފް ފަޔާ އެންޑް ރެސްކިއު ސާވިސް (އެފްއާރްއެސް) އިން ހަރަކާތްތެރިވެ އެހީތެރިކަން ފޯރުކޮށްދީފައިވާކަމަށް އެމްއެންޑީއެފް އިން ބުނެފިއެވެ.
އެ އިދާރާއިން އާންމުކޮށްފައިވާ ތަފާސްހިސާބުތަކުން ހާމަވާ ގޮތުގައި 7 ޖޫން އިން 13 ޖޫން 2026 އަށް ކުއްލި ނުރައްކަލުގެ 16 ހާދިސާ ހިނގާފައިވާއިރު އޭގެތެރެއިން އެންމެ ގިނައީ އަލިފާނުގެ ހާދިސާތަކެވެ. އެގޮތުން އަލިފާނުގެ 5 ހާދިސާއެއް ރިޕޯޓުކޮށްފައިވާކަމަށް އެމްއެންޑީއެފް އިން ވަނީ ބުނެފައެވެ.
މެޑިކަލް އިވެކުއޭޝަންގެ 5 ހާދިސާ ރިޕޯޓުކޮށްފައިވާއިރު، ނުރައްކާތެރި ކެމިކަލް (ހެޒްމެޓް)ގެ 2 ހާދިސާ، ގުދުރަތީ ކާރިސާތަކުގެ 2 ހާދިސާ އަދި މީހުން ސަލާމަތްކުރުމުގެ 1 ހާދިސާ ރިޕޯޓުކޮށްފައިވާކަމަށް އެމްއެންޑީއެފްގެ ތަފާސްހިސާބުތަކުން ވަނީ ހާމަވެފައެވެ.
މި ހާދިސާތަކުގެ ތެރެއިން އެންމެ ގިނަ ހާދިސާ ހިނގައިގެން ރިޕޯޓުކޮށްފައިވަނީ މާލެ ސަރަހައްދުންކަމަށް އެމްއެންޑީއެފް އިން ވަނީ ބުނެފައެވެ. އޭރިއާ ކޮމާންޑްތަކުން ހާދިސާތަކަށް އެޓެންޑްވި ގޮތުގެ ތަފްސީލަކީ:
- އެމްއެންޑީއެފް މާލެ އޭރިއާ ކޮމާންޑް: 13 ހާދިސާ
- އެމްއެންޑީއެފް ސަދަން އޭރިއާ ކޮމާންޑް: 2 ހާދިސާ
- އެމްއެންޑީއެފް ނޮދަން އޭރިއާ ކޮމާންޑ: 1 ހާދިސާ
ކުއްލި ނުރައްކާތަކުގެ ހާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމަށް އެމްއެންޑީއެފް ފަޔާ އެންޑް ރެސްކިއު ސާވިސްއިން ދަނީ ހުއްޓުމެއްނެތި ގިނަ މަސައްކަތްތަކެއް ކުރަމުންނެވެ.
