މަސްތުވާތަކެއްޗާބެހޭ ގާނޫނުގެ ދަށުން ބާރު ލިބިގެން އެކުލަވާލާފައިވާ، މަސްތުވާތަކެތީގެ އޮޕަރޭޝަންތަކާއި ކުޑަކަމުދާ އެއްޗެހި ޓެސްޓުކުރުމުގެ އާ ގަވާއިދު މިއަދު ސަރުކާރުގެ ގެޒެޓުގައި ޝާއިއުކޮށް، އެއަށް އަމަލުކުރަން ފަށައިފިއެވެ.
ދިވެހި ފުލުހުންގެ ހިދުމަތުން އެކުލަވާލި މި ގަވާއިދަކީ މަސްތުވާތަކެތީގެ މައްސަލަތައް ތަހުގީގުކުރުމުގައާއި، ކޮންޓްރޯލްޑް ޑެލިވަރީ އޮޕަރޭޝަންތައް ހިންގުމުގައި އަމަލުކުރާނެ އިޖުރާއަތުތައް ބަޔާންކުރާ ގަވާއިދެކެވެ.
މި ގަވާއިދުގައިވާ ގޮތުން، ކޮންޓްރޯލްޑް ޑެލިވަރީ އޮޕަރޭޝަނެއް ހިންގުމުގެ ހުއްދަ ދެވޭނީ ކޮމިޝަނާ އޮފް ޕޮލިސްއަށް ނުވަތަ އޭނާ ކަނޑައަޅާ ޗީފް އިންސްޕެކްޓާ އޮފް ޕޮލިސް ރޭންކުން ފެށިގެން މަތީގެ އޮފިސަރަކަށެވެ. އަދި މިފަދަ އޮޕަރޭޝަންތަކުގައި ރައްކާތެރިކަމަށްޓަކައި މަސްތުވާތަކެތީގެ ބަދަލުގައި އެހެން އެއްޗެއް (ސަބްސްޓިޓިއުޓެއް) ބޭނުންކުރުމުގެ އިހުތިޔާރު ފުލުހުންނަށް ލިބިގެންވެއެވެ. މީގެ އިތުރުން، އޮޕަރޭޝަން ނިމޭތާ 72 ގަޑިއިރުގެ ތެރޭގައި އެކަމުގެ ލޮގްތައް ރެކޯޑުކުރަން ޖެހޭނެ ކަމަށްވެސް ބަޔާންކޮށްފައިވެއެވެ.
ކުޑަކަމުދާ އެއްޗެހި ތަހުލީލުކުރުމާ ގުޅޭގޮތުން މި ގަވާއިދުގައި ވަނީ ހަރުދަނާ އުސޫލުތަކެއް ކަނޑައަޅާފައެވެ. އެގޮތުން މަސްތުވާތަކެތި ބޭނުންކުރިކަމުގެ ތުހުމަތުކުރެވޭ މީހުންނާއި، މަސްތުވާތަކެއްޗާއެކު ހައްޔަރުކުރެވޭ މީހުން ކުޑަކަމުދާ އެއްޗެހި ދިނުމަށް ފުލުހުން އެންގުމުން، އެކަމަށް އިންކާރުކޮށްފިނަމަ އަމަލުކުރާނެ ގޮތްތައް ވަނީ ތަފުސީލުކޮށްދީފައެވެ. ސީދާ އިންކާރުކުރުމުގެ އިތުރުން، އެންގުމަށްފަހު 12 ގަޑިއިރު ފާއިތުވާއިރު ސާމްޕަލް ނުދިނުމާއި، ސާމްޕަލް ގަޑުބަޑުކުރަން އުޅުމަކީ ވެސް ސާމްޕަލް ދިނުމަށް އިންކާރުކުރުން ކަމުގައި ބެލެވޭނެއެވެ. ޓެސްޓުކުރުމަށްޓަކައި މަދުވެގެން 20 މިލިލީޓަރުގެ ސާމްޕަލެއް ނަގަންޖެހެއެވެ.
ނަގާ ސާމްޕަލް ދެ ބަޔަކަށް ބަހާލަންޖެހޭއިރު، ފުރަތަމަ ބައި ތަހުލީލުކުރާނީ ފުލުހުންގެ ލެބޯޓަރީގައެވެ. އެ ނަތީޖާއާމެދު ހިތްހަމަނުޖެހޭނަމަ، ސާމްޕަލް ދިން ފަރާތުގެ އަމިއްލަ ހަރަދުގައި، ސަރުކާރުން ހުއްދަދީފައިވާ އެހެން ލެބޯޓަރީއަކުން ދެވަނަ ބައި ތަހުލީލުކުރުމުގެ ފުރުސަތު މި ގަވާއިދުން ލިބިދެއެވެ. މިކަމަށް އެދޭ ފަރާތްތަކުން ތިން ދުވަހުގެ ތެރޭގައި ފައިސާ ދައްކަންޖެހެއެވެ. އަދި ސާމްޕަލްތައް އެއްތަނުން އަނެއްތަނަށް އުފުލުމުގައާއި ރައްކާތެރިކޮށް ބެހެއްޓުމުގައި އަމަލުކުރާނެ ހަރުދަނާ މިންގަނޑުތަކެއްވެސް މި ގަވާއިދުގައި ވަނީ ހިމަނާފައެވެ.
މި އާ ގަވާއިދުގެ ސަބަބުން މަސްތުވާތަކެތީގެ މައްސަލަތައް ތަހުގީގުކުރުމުގައި ފުލުހުންނަށް އިތުރު ފަސޭހަތަކެއް ލިބި، އިޖުރާއަތުތައް ކުރިއަށްވުރެ ހަރުދަނާވެގެންދާނެއެވެ.
