ސަރުކާރުގެ ޕަބްލިކް ސެކްޓާ އިންވެސްޓްމެންޓް ޕްރޮގްރާމްގެ ދަށުން އިމާރާތްކުރާ 6 ރަށެއްގެ ކައުންސިލު އިދާރާގެ މަސައްކަތް ނިމިފައިވާ ކަމަށް މިނިސްޓާ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވާކްސް އާދަމް ޝަރީފު އުމަރު ވިދާޅުވެއްޖެއެވެ
މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި މައުލޫމާތު ދެއްވަމުން މިނިސްޓަރު ވިދާޅުވި ގޮތުގައި މަސައްކަތްތައް ނިމިފައިވާ ކައުންސިލު އިދާރާތަކަކީ ތ. ކިބިނދޫ، ށ. ނޫމަރާ، ލ. ކަލައިދޫ، މ. ރަތްމަންދޫ އަދި މ. ވޭވަށުގެ އިތުރުން އަދި އދ. ހަންޏާމީދޫ ކަމަށެވެ.
މިނިސްޓަރު އިތުރަށް ވިދާޅުވީ 5 ރަށެއްގެ މަސައްކަތް މިހާރު ވެސް ހިނގަމުންދާކަމަށެވެ. އޭގެތެރޭގައި ފ. ބިލެތްދޫ، ހއ. ހޯރަފުށީ، އދ. ދިއްދޫ އަދި ގދ. ހޯޑެއްދޫގެ އިތުރުން ހދ. ކުރިނބީ ހިމެނެއެވެ.
މީގެ އިތުރުން ކ. ދިއްފުށި ކައުންސިލް އަދި ނ. މިލަދޫ ކައުންސިލް އިމާރާތުގެ ނުނިމި ހުރި މަސައްކަތް ނިންމުމަށް ޓަކައި، މި މަސް ހުސްވުމުގެ ކުރިން އެމްޓީސީސީއާ ހަވާލު ކުރެވޭނެ ކަމަށް މިނިސްޓާ ވިދާޅުވިއެވެ.
ކޮންޓްރެކްޓާ ފައިނޭންސް އުސޫލުން އިމާރާތްކުރުމަށް ހަމަޖެހިފައިވާ ކައުންސިލް އިދާރާތަކާ ބެހޭގޮތުން ވާހަކަ ދައްކަމުން މިނިސްޓަރު ވިދާޅުވީ އިމާރާތްކުރުމަށް ހަމަޖެހިފައިވާ 55 ކައުންސިލް އިދާރާގެ މަސައްކަތްތައް މި އަހަރުގެ ޖޫން މަހުގެ ނިޔަލަށް ނިންމާލެވޭނެ ކަމަށާއި، އަލަށް އިމާރާތް ކުރެވޭ ކައުންސިލުތައް ހުންނާނީ ޒަމާނީ ފެންވަރަށް އަޕްގްރޭޑް ކުރެވިފައި ކަމަށެވެ.
މިނިސްޓާ ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަށްރަށުގެ ކައުންސިލްތަކަށް ވެވަޑައިގެންފައިވާ ވައުދުފުޅާ އެއްގޮތަށް، ރައްޔިތުންނަށް ދޭ ހިދުމަތްތައް ފުޅާކުރުމަށް ހިންގާ މަޝްރޫއުގެ ދަށުން 54 ރަށުގައި ކައުންސިލް އިމާރާތްކުރުމުގެ އަމަލީ މަސައްކަތް މިހާރު ފެށިފައިވާ ކަމަށެވެ. އެގޮތުން ބައެއް ރަށްރަށުގައި މިހާރު ވަނީ ހިޔާކުރުމާ ހިސާބަށް މަސައްކަތް ގެންދެވިފައި ކަމަށެވެ. އަދި މަސައްކަތް ނުފެށި އޮތް ރަށުގެ މަސައްކަތް ފެށުމުގެ ތައްޔާރީތައް ވެފައިވާ ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓާ ވިދާޅުވީ އެ ތަންތަން ކައުންސިލްތަކާ ހަވާލުކުރާނީ ފުލީ-ފާނިޝްޑް ތަންތަނުގެ ގޮތުގައި، ބޭނުންވާ ހުރިހާ މޭޒާއި ގޮނޑި އަދި ކައުންޓަރުތަކާއެކުގައި ކަމަށާ، މިއީ ޓާރންކީ ޕްރޮޖެކްޓެއް ކަމަށެވެ.
