އިޒްރޭލާއިން އެމެރިކާއިން އީރާނަށް ދެމުން ގެންދާ ހަމަލާތަކާ ގުޅިގެން އީރާނުން ދޭން ފެށި ރައްދު ހަމަލާތަކުގައި ތެލުގެ އިންޑަސްޓްރީއަށް ލޮޅުން އަރައި ދުނިޔޭގެ ބާޒާރުގައި ތެލުގެ އަގުތައް އުފުލުމުން ރާއްޖޭގައި ވެސް ތެލުގެ ބާވަތްތަކުގެ އަގުތައް އުފުލިއްޖެއެވެ.
ތެޔޮ ވިއްކާ މައި ކުންފުނި، އެސްޓީއޯއިން ބުނީ، އެ ކުންފުނީގެ ދަށުން ހިންގާ އެފްއެސްއެމްގެ ޕެޓްރޯލް ޝެޑުތަކުން ޕެޓްރޯލާއި ޑީސަލް ވިއްކާ އަގު މިއަދުން ފެށިގެން ބަދަލުވާނެ ކަމަށެވެ.
އެގޮތުން، 13.50ރ. އަށް ވިއްކަމުން ގެންދިޔަ ޕެޓްރޯލް ލީޓަރެއް މިއަދުން ފެށިގެން ވިއްކާނީ 16.01ރ. އަށެވެ. އެއީ 2.51ރ. ގެ ބޮޑުވުމުކެވެ.
އަދި 13.92ރ. އަށް ވިއްކަމުން ގެންދިޔަ ޑީސަލް ލީޓަރެއް، މިހާރު ވިއްކަނީ 17.54ރ. އަށެވެ. މިއީ 3.62ރ. ބޮޑުވުމެކެވެ.
އެސްޓީއޯގެ އިތުރުން އެންމެ ގިނައިން ތެލުގެ ބާވަތްތައް ވިއްކާ އަމިއްލަ ކުންފުނި ހޯކްސް އން ވެސް ވަނީ ޕެޓްރޯލާއި ޑީސަލްގެ އަގުތައް ބޮޑުކޮށްފައެވެ.
އެގޮތުން ޑީސެލް ލީޓަރަކުން 3.62ރ. ބޮޑުކޮށް އަދި ޕެޓްރޯލް ލީޓަރަކުން 2.51ރ. ވަނީ ބޮޑުކޮށްފައެވެ.
އިޒްރޭލާއި އެމެރިކާއިން ފެށި ހަނގުރާމަ އިތުރަށް ފުޅާވެ ތެލުގެ ބާޒާރަށް ލޮޅުން އެރީ، ތެޔޮ އުފައްދާ ގަލްފުގެ ގައުމުތަކުގައި ހުންނަ އެމެރިކާގެ ބޭސްތަކަށްް އީރާނުން ހަމަލާތައް ދޭން ފެށުމާއި، ބައެއް ހަމަލާތައް ސީދާ ތެޔޮ ކާރުހާނާތަކަށް އަމާޒުވެ އެތަންތަނަށް ގެއްލުންތަކެއް ލިބެން ފެށުމުންނެވެ. މީގެ އިތުރުން ދުނިޔޭގެ ތެލުގެ ވިޔަފާރީގެ ގާތްގަނޑަކަށް 80 ޕަސެންޓް ދަތުރުކުރާ ހޮރުމޫޒު ކަނޑޮއޮޅި އީރާނުން ބަންދު ކޮށް، އެ ކަނޑުއޮޅި ހުއްޓުމަކަށް ގެނައުމަކީވެސް ތެލުގެ އަގުތައް އުފުލެމުންދާ ސަބަބެކެވެ.
މިއަދު ދުނިޔޭގެ ބަޒާރުގައި ސާފުނުކުރާ ތެޔޮ ފީފާއެއް ހުރީ 90 ޑޮލަރާ ކައިރިއަށް އަރާފައެވެ. މިއީ ހަނގުރާމައިގެ ކުރިން 65 ޑޮލަރުގައި ހުރި އެއްޗެކެވެ. އަގުތަކަށް ބަލާނަމަ ތެލުގެ އެކިއެކި ބާވަތްތަކުގެ އަގު އެވްރެޖްކޮށް 10 ޕަސެންޓް ވަނީ އުފުލިފައެވެ.
