ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ ކެމްޕެއިނުގައި ވެރިކަން ކުރާ ޕީއެންސީ އިން ގަލޮޅު ދެކުނު ސަރަހައްދަށް ހާއްސަކޮށް މިއަދު ކުރިއަށްގެންދިޔަ ދޮރުން ދޮރަށް ކެމްޕެއިން ހަރަކާތުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގެންފިއެވެ.
ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ކެންޑިޑޭޓުންނާގެ މިއަދުގެ މެންދުރުފަހު މި ހަރަކާތް ފެށިގެންދިޔައީ ސްޓެލްކޯ ބިޒްނަސް ސެންޓަރު ކުރިމަތި، އަމީނީ މަގުންނެވެ.
ފޯރި އާ ޖޯށުގައި ޕީއެންސީގެ ކެމްޕެއިންތައް ކުރިއަށްދާއިރު، ގިނަ ކެމްޕެއިން ހަރަކާތްތައް ހުރީ ރައްޔިތުންނާ ވީހާވެސް ގާތުން، ރައްޔިތުންގެ އަޑު އަހައިގެން ކުރިއަށްދެވޭނެފަދަ ގޮތަކަށެވެ. އެގޮތުން ޕީއެންސީއިން ސިލްސިލާކޮށް ބާއްވަމުންދާ ދޮރުން ދޮރަށް ކެމްޕެއިން ހަރަކާތުގައި ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ކެންޑިޑޭޓުންނާއި، ޕީއެންސީގެ އިސް ލީޑަރުންނާއި، ގިނަ އަދަދެއްގެ އާންމު މެމްބަރުން ނިކުމެއް ދޮރުން ދޮރަށް ގޮސް އާންމު ރައްޔިތުންނާ ބައްދަލުކޮށް، ރައްޔިތުންގެ އަޑު އަހައި، އެކި ކަންކަން މަޝްވަރާ ކުރުމުގައި މަސްއޫލުވެ އުޅޭތަން ފެނެއެވެ.
ޕީއެންސީގެ ގިނަ ކެމްޕެއިން ގިނަ ހަރަކާތްތަކުގައި، ރައީސް ޑރ. މުއިއްޒު އަދި އަނބިކަނބަލުން، ސާޖިދާ މުހައްމަދު ވެސް ބައިވެރިވެވަޑައިގަންނަވައެވެ. އެގޮތުން އިއްޔެ ބޭއްވި މައްޗަންގޯޅު ދެކުނުގެ ސަރަހައްދުގެ ދޮރުން ދޮރަށް ކެމްޕެއިންގައިވެސް ރައީސް ޑރ. މުހައްމަދު މުއިއްޒު ވަނީ ބައިވެރިވެވަޑައިގެންފައެވެ.
