މެދުއިރުމަތީގެ ހަނގުރާމައިގެ ސަބަބުން ދަތުރުކުރުމުގައި ދަތިތަކާ ކުރިމަތިލާންޖެހިފައިވާ، ފަތުރުވެރިންނަށް ދޫކޮށްފައިވާ ވިސާގެ މުއްދަތު އިތުރުކުރުމަށް ނިންމާފައިވާކަމަށް އިމިގްރޭޝަނުން ބުނެފިއެވެ.
އިމިގްރޭޝަނުން ބުނީ ފެބްރުއަރީ 28 ވަނަ ދުވަހު މެދުއިރުމަތީގައި ފެށުނު ހަމަނުޖެހުންތަކާ ގުޅިގެން ރާއްޖެއަށް ދަތުރުކުރުމަށް ހަމަޖެހިފައިވާ ބައެއް ފްލައިޓްތައް ކެންސަލްވެފައިވާ ކަމަށެވެ. އަދި ރާއްޖޭގައި މި ވަގުތު ތިބި ފަތުރުވެރިންނަށް ވިސާގެ މުއްދަތު ހަމަވުމާ ހަމައަށް ފުރޭނެ އިންތިޒާމެއް ނެތްކަން ފާހަގަކޮށް އިމިގްރޭޝަނުން ބުނީ އެ ފަރާތްތަކުގެ ޓޫރިސްޓް ވިސާ އިތުރުކުރުމަށް ނިންމާފައިވާ ކަމަށެވެ.
މެދުއިރުމަތީގެ ހަނގުރާމައިގެ ސަބަބުން އެސަރަހައްދުގެ ބައެއް ގައުމުތަކުގެ ވައިގެ ސަރަހައްދު ބަންދުކުރުމުގެ ސަބަބުން ފަސިންޖަރުންނަށް ދިމާވެފައިވާ ދަތިތަކަށް ހައްލު ހޯދައިދިނުމުގެ ގޮތުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލް އިން ދަނީ ގިނަ މަސައްކަތްތަކެއް ކުރަމުންނެވެ.
އެގޮތުން އިއްޔެ ފެށި ހަނގުރާމައިގެ ސަބަބުން ނުފުރުނު ފަސިންޖަރުންނަށް އެހީވުމަށް ވެލާނާ އިންޓަނޭޝަނަލް އެއާޕޯޓުގައި ޑިސްރަޕްޝަން މެނޭޖްމަންޓް ސެންޓަރެއްވެސް ވަނީ ގާއިމުކޮށްފައެވެ. މިމަސައްކަތުގެ ދަށުން ރޭގެ ނިޔަލަށް އެމްއޭސީއެލް އިން ވަނީ ނުފުރިތިބި 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށްދީފައެވެ.
