ރާއްޖޭގެ ގައުމީ ފުޓްސަލް ޓީމުން، ސާފް ފުޓްސަލް ޗެމްޕިއަންޝިޕް ކާމިޔާބުކުރުމުގެ އިތުރުން ގައުމީ ފުޓްބޯޅަ ޓީމުން މިދިޔަ އަހަރު ބޭއްވި ސުޕަ ކަޕްގެ ޗެންޕިއަންކަން ހޯދުމާ ގުޅިގެން އެއް މިލިޔަން ރުފިޔާގެ ބޯނަހެއް ދިނުމަށް ރައީސުލްޖުމްހޫރިއްޔާ، ޑރ. މުހައްމަދު މުއިއްޒު ނިންމަވައިފިއެވެ.
މިކަން އިއުލާންކުރައްވާފައި ވަނީ ޕީއެސްއެމްއަށް ދެއްވި އިންޓަވިއުއެއްގައި ސްޕޯޓްސް މިނިސްޓަރު އަބްދުﷲ ރާފިއު އެވެ. ރާފިއު ވިދާޅުވި ގޮތުގައި ރައީސް މިފަދައިން ނިންމަވާފައި ވަނީ މިދިޔަ އަހަރުގެ އޮކްޓޯބަރު 2 ގައި ގައުމީ ޓީމާއެކު ސިޓްރޮން ރެސްޓޯރެންޓުގައި ބޭއްވި ބައްދަލުވުމެއްގައެވެ.
ބޯނަސް ދިނުމަށް ހަމަޖެހިފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް ކަމަށްވެސް ރާފިއު ވިދާޅުވެފައި ވެއެވެ. އަދި ފައިސާ ހަވާލުކުރާނީ ފުޓުބޯޅަ އެސޯސިއޭޝަން މެދުވެރިކޮށް ކަމަށް ވެއެވެ.
ސްރީ ލަންކާ ފުޓްބޯޅަ ފެޑެރޭޝަން އިން އިންތިޒާމްކޮށްގެން ކުރިޔަށް ގެންދިޔަ ސައުތު އޭޝިއަން ސުޕަ ކަޕް ކުރިއަށްގެންގޮސްފައި ވަނީ މިދިޔަ ސެޕްޓެމްބަރު މަހުއެވެ. ސުޕަ ކަޕްގެ ޗެމްޕިއަންކަން ރާއްޖެއިން ހޯދީ ސްރީލަންކާއާ ދެކޮޅަށް އެގައުމުގައި ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށް، އަނެއް މެޗު އެއްވަރުކޮށްގެންނެވެ. ރާއްޖޭން ފުރަތަމަ މެޗު 3-0 އިން މޮޅުވިއިރު، ދެ ވަނަ މެޗު ނިމުނީ 1-1 އިން އެއްވަރުވެގެންނެވެ. އަދި އެފަަހަރު ޗެމްޕިއަން ކަން ކަނޑައެޅީ އެގްރިގޭޓުންނެވެ.
އަދި ހަމަ އެހެންމެ ތައިލެންޑްގައި މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ ފިރިހެނުންގެ މުބާރާތުގެ ޗެމްޕިއަންކަން ދިވެހިރާއްޖެ ވަނީ ހޯދާފަ އެވެ. ފަހުރުވެރި އެ ކާމިޔާބީ ގައުމީ ޓީމުން ހޯދީ އެއްވެސް މެޗަކުން ބަލިނުވެ އަދި ބާކީ އެއް މެޗު ވެސް އޮއްވަ އެވެ.
ކުޅުންތެރިންގެ ފެންވަރު މަތިކޮށް ބައިނަލްއަގްވާމީ މައިދާނުގައި ދިވެހި ކުޅުންތެރިން ހޯދާ ކާމިޔާބީތައް އިތުރު ކުރުމަށް އެސޯސިއޭޝަންތަކާ ގުޅިގެން ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.
