އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދި މައްސަލާގައި ކުށަށް އިއުތިރާފިވެފައިވާ އިމިގްރޭޝަން އޮފިސަރަށް މިއަދު ހުކުމްކޮށްފިއެވެ.
މި މައްސަލައިގައި ކުށަށް އިއުތިރާފުވެފައި ވަނީ މިދިޔަ މާޗް މަހުގެ މަހުގެ 20 ވަނަ ދުވަހުގެ ރޭ ހައްޔަރުކޮށް، ދައުވާކުރި 5 މީހުންގެ ތެރޭގައި ހިމެނޭ ތ. ބުރުނި، މޫނިމާގެ އުމުރުން 21 އަހަރުގެ މުހައްމަދު އަލްސަން އިސްމާއީލްއެވެ.
އިމިގްރޭޝަންގެ ބައެއް މުވައްޒަފުން ގަވާއިދާ ހިލާފު އޮޕަރޭޝަނެއްގައި ބިދޭސީ މަސައްކަތްތެރިންގެ ބަޔަކު ހައްޔަރުކޮށް އޭގެ ތެރެއިން އެކަކުގެ އަތުން 530،000ރ. ނެގި މައްސަލައިގައި ދައުލަތުން ވަނީ އަލްސަން އާއި އެކު އިއުތިރާފުގެ އެއްބަސްވުމެއް އެކުލަވާލައިފައެވެ.
މި މައްސަލައިގައި ހުކުމްކުރުމަށް މިއަދު ކްރިމިނަލް ކޯޓުން ބޭއްވި އަޑުއެހުމުގައި، ގާޒީ އިބްރާހީމް އިހުސާން އަދަބު ކަނޑައެޅުއްވީ ވެސް އިއުތިރާފު އެއްބަސްވުމުގައިވާ ގޮތަށެވެ. އެ ގޮތުން ކުށުގެ އަސާސީ އަދަބަކީ 9 މަހާއި 18 ދުވަހުގެ މުއްދަތަކަށް ޖަލަށް ލުންކަމުގައިވާއިރު އިއުތިރާފު އެއްބަސްވުމުގައި ވަނީ އޭގެ ތެރެއިން ޖަލު އަދަބުގެ ގޮތުގައި 2 މަހާއި 3 ދުވަސް ކަނޑައެޅުމަށެވެ. އަދި ހުކުމުގެ ބާކީ ޖޫރިމަނާއަށް ބަދަލުކޮށް، ޖޫރިމަނާގެ ގޮތުގައި 45،000ރ. އެއް އަހަރުގެ ތެރޭގައި ދައްކާ ގޮތަށެވެ.
މި މައްސަލަގާއި އަލްސަން ބަންދުގައި 2 މަހާއި 3 ދުވަސް ހޭދަކޮށްފައިވާއިރު އެ މުއްދަތު ހުކުމުން އުނިކުރުމުން ތަންފީޒުކުރާނެ އަދަބެއް ނެތްކަމަށް ކްރިމިނަލް ކޯޓުން ވަނީ ހުކުމްކޮށްފައެވެ.
