ރައީސް ޑރ. މުހައްމަދު މުއިއްޒު މާލެ ސިޓީގެ އަވަށްތަކުގެ ރައްޔިތުންނާއެކުގައި ބާއްވަވާ ބައްދަލުވުންތަކުގެ ތެރެއިން މާފަންނު ރައްޔިތުންނާއެކު ބޭއްވުމަށް ހަމަޖެހިފައިވާ ބައްދަލުވުމުގައި ރައްޔިތުން ކުރަން ބޭނުންވާނަމަ އެކަން އަންގައިދިނުމަށް އެދިފައިވަނީ އަމިއްލަ ހައިސިއްޔަތުން ކަމުގައި މާފަންނު މެދު ދާއިރާގެ މެމްބަރު އަސްމާ ރަޝީދު ވިދާޅުވެއްޖެއެވެ.
ރައީސް ޑރ. މުއިއްޒު އާ ސުވާލު ކުރައްވަން ބޭނުން ނަމަ، އަދި ސިޓީ، ނޯޓުކޮޅެއް ރައީސަށް ދެއްވަން ބޭނުންފުޅު ނަމަ، އޭނާ އަތަށް ދެއްވުމަށް ވެސް އަސްމާ އެދިވަޑައިގެންފައިވާއިރު ރައީސް ވަނީ ރައްޔިތުންނާއެކުގައި ބާއްވަވާ ބައްދަލުވުންތަކުގައި އެމަނިކުފާނާ ބޭނުން ސުވާލެއް ކުރެއްވޭނެ ކަމަށާއި ބައްދަލުވުމަށް ފަހު ސިޓީ، ނޯޓެއް ދެއްވަން ބޭނުންފުޅު ނަމަ، ސީދާ އެމަނިކުފާނު އަތްޕުޅަށް އެރުވޭނެ ކަމަށް ވިދާޅުވެފައެވެ.
ރައީސް މިހެން ވިދާޅުވެފައިވާއިރު، އަސްމާ ނެރުނު ބަޔާނެއްގައި ބުނީ ޑިސެންބަރު 4 ވަނަ ދުވަހު މާފަންނު ރައްޔިތުންނާއެކު ބާއްވާ ބައްދަލުވުމާއި ގުޅޭ ގޮތުން އެ ދާއިރާގެ މެންބަރެއްގެ ހައިސިއްޔަތުން ފޮނުވި މެސެޖުގެ މާނަ އޮޅޭ ގޮތަށް ސޯޝަލް މީޑިއާގައި ދަުރުކުރަމުން އަންނަކަމަށެވެ. އެ މެސަޖަކީ ޖަލްސާގައި އެއްވެސް ސަބަބަކާ ހުރެ ރައީސް އަށް ސީދާ ސުވާލުކުރުމުގެ ފުރުސަތު ނުލިބޭ ފަރާތްތަކުގެ ހިޔާލާ ފިކުރު ރައީސް އާއި ހަމައަށް ޔަގީންކަމާއެކު ފޯރުކޮށްދިނުމުގެ މަގުސަދުގައި އެ ދާއިރާގެ ރައްޔިތުންގެ ހައްގުގައި އަމިއްލަ ހައިސިއްޔަތުން ފޮނުވި މެސެޖެއް ކަމަށް އަސްމާ ވިދާޅުވިއެވެ.
އިތުރަށް އަސްމާ ވިދާޅުވީ މާފަންނު މެދު ދާއިރާގެ ކޮންމެ ރައްޔިތަކަށްވެސް، އެ ރައްޔިތެއްގެ ހިޔާލާ ކަންބޮޑުފުންތައް ފާޅުކުރުމުގެ ފުރުސަތު ލިބުމަކީ މުހިއްމު ކަމެއް ކަމަށެވެ.
