37 އަހަރުގެ އަސްކަރީ ހިދުމަތަށް ފަހު ބްރިގޭޑިއާ ޖެނެރަލް އަހްމަދު ނަޝީދު، ޝަރަފުވެރިކަމާ އެކު ސިފައިންގެ ހިދުމަތުން ރިޓަޔާކުރައްވައިފިއެވެ.
އެކަމަށްޓަކައި ރޭ ބަންޑާރަކޮށީ އޮޑިޓޯރިއަމުގައި ވަނީ ހާއްސަ ރަސްމިއްޔާތެއް ބާއްވާފައެވެ.
އެ ރަސްމިއްޔާތުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުހައްމަދު މުއިއްޒު ދެއްވާ ހާއްސަ ސިޓީފުޅު، ބްރިގޭޑިއާ ޖެނެރަލް ރިޓަޔާޑް އަހްމަދު ނަޝީދުއާ ހަވާލުކޮށްދެއްވީ ޑިފެންސް މިނިސްޓަރު މުހައްމަދު ޣައްސާން މައުމޫނެވެ.
އެ ރަސްމިއްޔާތުގައި އެމްއެންޑީއެފުން ދެއްވާ ސިޓީ، އިހްލާސްތެރި ހިދުމަތް ރަމްޒުކޮށްދޭ ޑެކަރޭޝަން ބޯޑު އަދި ރިޓަޔާމަންޓްގެ ރަމްޒީ ކާޑު ވެސް އަހްމަދު ނަޝީދުއާ ހަވާލުކޮށްފައެވެ. ބްރިގޭޑިއާ ޖެނެރަލް އަހްމަދު ނަޝީދު ސިފައިންގެ ހިދުމަތުން ޝަރަފުވެރިކަމާ އެކު ރިޓަޔާކުރެއްވި އިރު ހުންނެވީ ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް (ޖޭ4/ޖޭ8)ގެ ޑައިރެކްޓާ ޖެނެރަލް އަދި އޯޑްނަންސް ސާވިސްގެ ކޮމާންޑަރުގެ މަގާމުގައެވެ.
އަހްމަދު ނަޝީދުގެ ދިގު އަސްކަރީ ހިދުމަތުގައި އަދާކުރައްވާފައިވާ މަގާމުތައް:
- ޑައިރެކްޓަރޭޓް އޮފް ލޮޖިސްޓިކްސް އެންޑް ރިސޯސް މެނޭޖްމަންޓް (ޖޭ4/ޖޭ8)ގެ ޑައިރެކްޓާ ޖެނެރަލްގެ މަގާމް
- ޑައިރެކްޓަރޭޓް އޮފް ލޮޖިސްޓިކްސް (ޖޭ4) ގެ ޕްރިންސިޕަލް ޑައިރެކްޓަރުގެ މަގާމް
- އޯޑްނަންސް ސާވިސްގެ ކޮމާންޑަރުގެ މަގާމާއި ކޮމާންޑިން އޮފިސަރުގެ މަގާމް
- ކްއާޓާ މާސްޓާ ސާވިސްގެ ކޮމާންޑިން އޮފިސަރުގެ މަގާމް
- ސްޕެޝަލް ޕްރޮޓެކްޝަން ގްރޫޕްގެ ކޮމާންޑިން އޮފިސަރުގެ މަގާމް
- ޓްރާންސްޕޯޓް ސާވިސްގެ ކޮމާންޑިން އޮފިސަރުގެ މަގާމް
- ސަޕްލައި ޔުނިޓުގެ ކޮމާންޑިން އޮފިސަރުގެ މަގާމް
- އޮފިސާ ކޮމާންޑިންގެ މަގާމާއި އޮފިސާ ކޮމާންޑިންގެ އެހީތެރިޔާގެ މަގާމް
އެ ރަސްމިއްޔާތުގައި ބްރިގޭޑިއާ ޖެނެރަލް އަހްމަދު ނަޝީދުގެ 37 އަހަރުގެ ސިފައިންގެ ހިދުމަތުގެ މައްޗަށް ތައްޔާރުކޮށްފައިވާ ވީޑިއޯ ރިޕޯޓެއް ހުށަހެޅުމުގެ އިތުރުން، ބްރިގޭޑިއާ ޖެނެރަލް އަހްމަދު ނަޝީދުގެ އަސްކަރީ ހިދުމަތުގެ ސައިޓޭޝަންއެއް ވަނީ އިއްވާފައެވެ.
