އެންމެ ރަނގަޅު ގޮތަކީ އިދިކޮޅު މައި ޕާޓީ ކަމަށްވާ އެމްޑީޕީ އާއި ޑިމޮކްރަޓްސް ގުޅިގެން މަސައްކަތް ކުރުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވީ މިއަދު އެކްސްގައި ހިއްސާ ކުރެއްވި ޕޯސްޓެއްގައެވެ. އެގޮތުން ރާއްޖެއަށް ވެސް އަދި ދެ ޕާޓީއަށް ވެސް އެންމެ ރަނގަޅު ގޮތަކީ އެއީ ކަމަށް ނަޝީދު ވިދާޅުވެފައި ވެފައި ވެއެވެ.
2005 ވަނަ އަހަރު އެމްޑީޕީ އުފެދުނީއްސުރެ އެ ޕާޓީގެ މަސައްކަތުގައި އިސްކޮށް އުޅުއްވި، އެ ޕާޓީގެ ބާނީންގެ ތެރޭގައި ހިމެނިވަޑައިގަންނަވާ ރައީސް ނަޝީދު އެމްޑީޕީން ވަކިވެވަޑައިގެންނެވީ 2023 ވަނަ އަހަރު ބޭއްވި ރިޔާސީ ޕްރައިމަރީން ނާކާމިޔާބު ވެވަޑައިގެންނެވުމުން އުފެދުނު ދެބަސްވުމުގަ އެވެ. "ފިކުރެއްގެ ދިރުން" ނަމުގައި އެެމަނިކުފާނު އޭރު ވަކި ފެކްޝަނެއްގައި މަސައްކަތް ކުރެއްވުމަށްފަހު 'ދަ ޑިމޮކްރަޓްސް'ގެ ނަމުގައި ވަނީ ވަކި ޕާޓީއެއް އުފައްދަވާފައެވެ.
އެޕާޓީން ރިޔާސީ އިންތިހާބުގައި ވާދަކުރި ނަމަވެސް ލިބިފައިވަނީ 3 ވަނަ އެވެ. އަދި ރިޔާސީ އިންތިހާބުގެ ދެވަނަ ބުރުގައި ރައީސް ނަޝީދުގެ ދަ ޑިމޮކްރެޓުން އެއްވެސް ކެންޑިޑޭޓަކަށް ތާއީދު ކޮށްފައި ނުވެއެވެ. އެ ދުވަސްވަރު އެމްޑީޕީން ވަކިވެ ވަޑައިގަތުމަށްފަހު އެމަނިކުފާނު ވަނީ ވަރުގަދަ ބަހުގެ ހަމަލާތަކެއް ވެސް އެމްޑީޕީއަށް ރައްދު ކުރައްވާފައެވެ.
އެއަށްފަހު ދާދި ފަހުން ވަނީ ބައެއް ޑިމޮކްރަޓްސްގެ މެންބަރުން އެނބުރި އެމްޑީޕީ އާއި ގުޅިވަޑައިގެންފައެވެ. އޭގެ ތެރޭގައި ދަ ޑިމޮކްރެޓްސްގެ ކުރީގެ ރައީސް ހަސަން ލަތީފާއި ދަ ޑިމޮކްރެޓްސްގެ ކުރީގެ ނައިބް ރައީސް މުހައްމަދު ޝިފާޒު އަދި ނިމިގެން ދިޔަ ރިޔާސީ އިންތިހާބުގައި ދަ ޑިމޮކްރެޓްސްގެ ކެންޑިޑޭޓުގެ އިލްޔާސް ލަބީބުގެ ރަނިންމޭޓެއްގެ ގޮތުގައި ވާދަ ކުރެއްވި ހުސައިން އަމްރު ވެސް ހިމެނިވަޑައިގަންނަވައެވެ.
ނަޝީދު މީގެ ކުރިން ވެސް ވަނީ އެމްޑީޕީއާއި ގުޅެން ތައްޔާރު ކަމަށް ވިދާޅުވެފައެވެ. އެމްޑީޕީގެ ޗެއާޕާސަން ފައްޔާޒް އިސްމާއީލަށް މިދިޔަ 2023 ވަނަ އަހަރުގެ އޮކްޓޯބަރު މަހު ފޮނުއްވެވި މެސެޖެއްގައި ވިދާޅުވީ އެމްޑީޕީގެ ގައުމީ މަޖިލީހުގެ 50 ޕަސެންޓް ތާއީދު އޮތް ނަމަ އެމްޑީޕީ އާއި ގުޅިވަޑައިގަންނަވަން ތައްޔާރަށް ހުންނެވި ކަމަށް ވިދާޅުވެފައެވެ.
