އާންމު ސިއްހަތަށް ނުރައްކާވާ ގޮތަށް ހިންގަމުންދިޔަ ކެފޭއަކުން 11 ބިދޭސީން ހައްޔަރުކޮށްފިއެވެ.
މި 11 ބިދޭސީން އަތުލައިގެންފައި ވަނީ ބުރާސްފަތި ދުވަހުގެ ރޭ ހިންގި ރެއިޑް އޮޕަރޭޝަނެއްގައި ކަމަށް އިމިގްރޭޝަނުން ވަނީ މައުލޫމާތު ދީފައެެވެ.
އިމިގްރޭޝަނުން ބުނީ ގަވާއިދާ ހިލާފަށް ރާއްޖޭގައި އުޅޭ ބިދޭސީންނަށް އަމާޒުކޮށް ޓާސްކު ފޯހުން ކުރިއަށްގެންދާ ރެއިޑު އޮޕަރޭޝަންތަކުގައި ބުރާސްފަތި ދުވަހުގެ ރޭ މާލޭގެ ކެފޭއެއް ބަލައި ފާސްކޮށްފައިވާ ކަމަށެވެ.
އެ ކެފޭ ހިންގަމުންދިޔައީ އާންމު ސިއްހަތަށް ނުރައްކާވާ ގޮތަށް ކަމަށް އިމިގްރޭޝަނުން ފާހަގަކޮށްފައިވާއިރު އެ ކެފޭގައި ގަވާއިދާ ހިލާފަށް އުޅެމުންދިޔަ 11 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ހައްލެއް ހޯދުމަށް މި ސަރުކާރުން ފެށި މަސައްކަތުގެ ތެރެއިން ގަވައިދާ ހިލާފަށް އުޅޭ ބިދޭސީންނަށް ފިޔަވަޅު އަޅައި އެފަދަ ބިދޭސީން އަންނަނީ ޑީޕޯޓް ކުރަމުންނެވެ.
