ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ ވެރިންނަށް އެންމެ ބޮޑުކޮށް މުސާރައިގެ ގޮތުގައި ދެވޭނީ 90،000 ރުފިޔާ ގޮތުގައި ހަމަޖެއްސައި ކުރިއަށް އޮތް ދެ އަހަރު ދުވަހު އެ ގޮތަށް އަމަލު ކުރުމަށް ޕްރައިވެޓައިޒޭޝަން އެންޑް ކޯޕަރޭޝަން ބޯޑް (ޕީސީބީ) އިން އަންގައިފިއެވެ.
ޕީސީބީން ނެރުނު ސާކިއުލާއެއްގައި ބުނީ، އިގްތިސޯދީ އިސްލާހީ އެޖެންޑާގެ ދަށުން ދައުލަތުގެ ހަރަދުތައް ކުޑަކުރުމުގެ މަގުސަދުގައި މުސާރައާ ގުޅޭގޮތުން ކުރިއަށް އޮތް ދެ އަހަރު ދުވަހުގެ މުއްދަތަށް އެޅުމަށް ނިންމާފައިވާ ފިޔަވަޅުތަކަށް އަމަލު ކުރުމަށް އަންގާ ކަމަށެވެ. އެ ގޮތުން ބޭންކުތައް ފިޔަވައި ސަރުކާރުގެ ހިއްސާވާ ކުންފުނިތަކުގެ މުވައްޒަފުންގެ ތެރެއިން ކުންފުނިތަކުގެ ޓެކްނިކަލް ދާއިރާތަކުގައި މަސައްކަތް ކުރާ މުވައްޒަފުން ނުހިމެނޭ ގޮތަށް ކުންފުނިތަކުގެ އެންމެ އިސް މަގާމުތަކުގައި ތިއްބަވާ ވެރިންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ކަނޑައަޅުއްވާފައި ކަމަށް ޕީސީބީން ބުނެއެވެ.
ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ ބޯޑު އޮފް ޑިރެކްޓަރުންގެ ތެރެއިން ރާއްޖެއިން ބޭރުގެ ޑިރެކްތަރުން ފިޔަވައި ބޯޑުތަުގެ ޗެއާމަން، މެނޭޖިން ޑިރެކްޓަރުން އަދި ޑެޕިއުޓީ މެނޭޖިނ ޑިރެކްޓަރުން ހިމެނޭހެން މުސާރައާއި އިނާޔާތުގެ ގޮތުގައި 90،000 ރުފިޔާއަށް އިތުރަށް ލިބޭ ބައި އުނިކުރުމަށް ފަހު މުސާރައާއި އިނާޔަތް ދިނުމަށް އަންގާ ކަމަށް ޕީސީބީން ބުނެއެވެ. އަދި އެފަދަ ކުންފުނިތަކުގެ ޓެކްނިކަލް މަސައްކަތް ކުރާ މުވައްޒަފުން ފިޔަވައި ދެން ތިބި މުވައްޒަފުންނަށް ވެސް މުސާރައާއި އިނާޔަތް ދޭ އިރު 90،000 ރުފިޔާއަށް ވުރެ އިތުރުވާ ނަމަ އެބައި އުނިކުރުމަށް ޕީސީބީން ވަނީ އަންގާފައެވެ.
މި ކަމާ ގުޅިގެން ގާނޫނީ ގޮތުން މުވައްޒަފުންނާއެކު ހަދާފައިވާ އެއްބަސްވުންތަކަށް ގެންނަން ޖެހޭ ބަދަލު ގެނައުމަށް ވެސް ޕީސީބީން ބުނެއެވެ. އަދި މި ގޮތަށް އަމަލު ކުރަން އަންގާފައި ވަނީ މި މަހުގެ އެއްވަން ދުވަހުން ފެށިގެން ކުރިއަށް އޮތް 2 އަހަރު ދުވަހުގެ މުއްދަތަށް ކަމަށް ވެސް ޕީސީބީން ބުނެއެވެ.
މި އަހަރަށް ބަޖެޓް ފާސްކުރި އިރު، މުސާރައަށް އަޅާ ފިޔަވަޅުތަކުގެ ތެރޭގައި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން 10 ޕަސެންޓް އުނިކުރުމާއި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުމުގެ އިތުރުން ވަނީ ސިޔާސީ މަގާމުތަކުގައި ތިއްބަވާ ބޭފުޅުންގެ މުސާރައިން 10 ޕަސެންޓް އުނިކުރުމަށް ވެސް ނިންމާފައެވެ. މީގެ އިތުރުން މުސާރައަށް ގެންނަން ނިންމަވާފައިވާ ބަދަލުތަކުގެ ތެރޭގައި، މިނިވަން މުައައްސަސާތަކުގެ އިސްވެރިންގެ މުސާރައިން 10 ޕަސެންޓް އުނިކުރުމަށް ކަމާބެހޭ ފަރާތްތަކަށް ހުށަހަޅަން ނިންމާފައި ވެއެވެ. އަދި ޝަރުއީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެންބަރުންގެ މުސާރައިން 10 ޕަސެންޓް އުނިކުރުމަށް އެ ފަރާތްތަކުގައި އެދުމަށް ވެސް ވަނީ ނިންމާފައެވެ.
މި ބަދަލުތައް ގެންނަވަން ނިންމަވާފައިވާ ކަން ހާމަ ކުރައްވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެފައި ވަނީ އެމަނިކުފާނުގެ މުސާރައިގެ 50 ޕަސެންޓް ނުނަގާ ގޮތަށް ހަމަޖައްސަވާނެ ކަމަށެވެ.
