ފާއިތުވި ދެތިން މަހު އަންހެން ނޫސްވެރިންނަށް ފުރައްސާރަކުރުން އިތުރުވެފައިވާ ކަމަށް ބުނެ މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކޮށްފިއެވެ.
މިކަމާ އެމްޖޭއޭއިން ކަންބޮޑުވުން ފާޅުކޮށްފައިވަނީ އެ ޖަމިއްޔާއިން ނެރުނު ބަޔާނެއްގައެވެ.
އެގޮތުން އަންހެން ނޫސްވެރިން ކުރާ މަސައްކަތާ ގުޅުވައިގެން އެ މީހުންނަށް ސޯޝަލް މީޑިއާގެ އެކި ޕްލެޓްފޯމްތަކުގައި މިދިޔަ ދެތިން މަސް ތެރޭގައި ފުރައްސާރަކުރުން އިތުރުވެފައިވާ ކަމަށާއި އެފަދަ މައްސަލަތަކެއް އެ ޖަމިއްޔާގެ ސަމާލުކަމަށް ވެސް އައިސްފައިވާ ކަމަށް އެމްޖޭއޭގެ ބަޔާނުގައި ބުނެފައި ވެއެވެ.
އަންހެން ނޫސްވެރިންނަށް ފުރައްސާރަ ކުރި މައްސަލަތަކުގައި ހިމެނެނީ:
- ސަންގު ޓީވީގެ ނޫސްވެެރިޔާ ފާތިމަތު މަދަދާއަށް އެކްސްގައި ކާކުކަން ނޭނގޭ ގޮތަށް ހަރަކާތްތެރިވާ އެނޮނިމަސް އެކައުންޓަކުން ފުރައްސާރަ ރައްދުވާ ގޮތަށް އޭނާގެ ފޮޓޯއާ އެކު ޕޯސްޓެއް ކޮށްފައިވާ ކަމަށެވެ. އެއީ ރައީސް ޑރ. މުހައްމަދު މުއިއްޒުގެ އިވެންޓުތައް މިފަހުން އޭނާ ކަވަރުކުރާތީ އެކަމާ ގުޅުވައިގެން ކޮށްފައިވާ ޕޯސްޓެއް ކަމަށް ވެއެވެ.
- ރިވާޔާ ނޫހުގެ އެޑިޓަރު އާއިދާ އަބްދުލް ހަކީމް، ވިޔަފާރިވެރިއަކާ ކުރި ސުވާލަކާ ގުޅިގެން، އެ ވިޔަފާރިވެރިޔާ ވަނީ އާއިދާއަށް ފުރައްސާރަކޮށް އެކްސްގައި ޕޯސްޓްތަކެއް ކޮށްފައި
- ސަންގު ޓީވީގެ ނޫސްވެރިޔާ ލައިޝާ އަހުމަދު ޒަކީއަށް ސޯޝަލް މީޑިއާގެ އެކި ޕްލެޓްފޯމްތަކުގައި ފުރައްސާރަކޮށް އިންޒާރު ދިނުން
- މިހާރު ނޫހުގެ ނޫސްވެރިޔާ އާސިމާ ނިޒާރު، ލިޔުނު ލިޔުމަކާ ގުޅުވައި އޭނާއަށް ސޯޝަލް މީޑިއާގައި ފުރައްސާރަކޮށް ބިރު ދައްކާފައިވާ މައްސަލަ
އެ އަމަލުތައް އެންމެ ހަރުކަށި އިބާރާތުން ކުށްވެރިކޮށް އެ ޖަމިއްޔާއިން ވަނީ އެފަދަ ކަންކަން އެއްވެސް ފަރާތަކުން ނުކުރުމަށް އިލްތިމާސްކޮށްފައެވެ.
އަދި ރާއްޖޭގައި ނޫސްވެރިކަމުގައި ހަރަކާތްތެރިވާ އަންހެނުންގެ ނިސްބަތް ވަރަށް މަދުކަން ފާހަގަކޮށް އެ ބަޔާނުގައި ބުނީ، މިގޮތަށް އެމީހުންނަށް ސީދާ ޓާގެޓްކޮށް ފުރައްސާރަކުރާ ނަމަ، އެ ދާއިރާއަށް ވަންނަ އަންހެނުންގެ ނިސްބަތް މަދުވާނެ ކަމަށާއި މިހާރު ތިބި އަންހެން ނޫސްވެރިންނަށް ވެސް ހުރަހަކަށް ވާނެ ކަމަށެވެ.
އަދި އެފަދަ މައްސަލަތައް ސީރިއަސް މައްސަލަތަކެއްގެ ގޮތުގައި ފުލުހުން ބަލައި ފިޔަވަޅު އަޅަން ވެސް އެ ޖަމިއްޔާ އިން ވަނީ ގޮވާލާފައެވެ.
