ތެލުގެ ވިޔަފާރިކުރާ ހޯކްސް ކުންފުނީގެ ބޯޓެއްގައި ސިނގިރޭޓު ވަގަށް އެތެރެކުރި ކަމަށް ބުނާ މައްސަލައިގައި އެ ކުންފުންޏަށް ކުރާ ތަހުގީގު ބިނާވެފައިވާ މައިގަނޑު އެއް ކުށަކީ މަނީ ލޯންޑްރިން ކުށް ކަމުގައި ފުލުހުން ބުނެފި އެވެ.
މިދިޔަ އޮކްޓޯބަރު މަހުގެ 24 ވަނަ ދުވަހު ކަސްޓަމްސް އަށް ލިބުނު މައުލޫމާތަކާ ގުޅިގެން ހިންގި ހާއްސަ އޮޕަރޭޝަނެއްގައި ވަނީ އެއާ ޖެހިގެން އަދި ދުވަހު ހޯކްސް ކުންފުނީގެ ބޯޓެއް ކަމަށްވާ 'އެމްޓީ ހޯކްސް ޖަވާހިރު' އާއި، ތިލަފުށީގައި ހުންނަ އެ ކުންފުނީގެ ބޯޓުޔާޑު ބަލައި ފާސްކޮށްފައެވެ. ގާތްގަނޑަކަށް 1.7 މިލިއަން ސިނގިރޭޓު ކަސްޓަމްސްގެ ބެލުމުގެ ދަށަށް ގެންގޮސްފައިވާ ކަމަށް އެ ހިދުމަތުން އޭރު ބުންޏެވެ.
އެ މައްސަލައާއި ގުޅިގެން ފުލުހުން މިއަދު ބުނީ، ރާއްޖެއަށް 200 މާސްޓަ ކާޓަން މެންޗެސްޓަ ސިނގިރޭޓް ސިއްރުން އެތެރެކުރި މައްސަލަ އެ ހިދުމަތާއި ކަސްޓަމްސްއިން ގުޅިގެން ތަހުގީގު ކުރަމުން އަންނަ ކަމަށެވެ.
އަދި ހަމައެހެންމެ މި މައްސަލައިގެ ތަހުގީގު ބިނާވެފައި ވަނީ މައިގަނޑު ދެ ކުށެއްގެ މައްޗަށް ކަމަށާއި އޭގެ ތެރޭގައި ހިމެނެނީ ކަސްޓަމްސްގެ ގާނޫނުގެ 97 ވަނަ މާއްދާގެ ދަށުން ރާއްޖެއަށް ސިއްރުން މުދާ އެތެރެކުރަން އުޅުމުގެ ކުށާ އަދި މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން މަނީ ލޯންޑްރިން ކުށް ކަމުގައި ފުލުހުން ވަނީ ބުނެފައެވެ.
މިކަމާ ގުޅިގެން ނެރުނު ބަޔާނެއްގައި ހޯކްސް ކުންފުނިން އޭރު ބުނީ، މި ކަމުގައި އެ ކުންފުނީގެ އެއްވެސް ބައިވެރިވުމެއް ނޯންނާނެ ކަމަށާއި، ސިނގިރޭޓު އެތެރެކުރި މުވައްޒަފުން އެކަން ކުރީ އަމިއްލަ މަންފާއަށް ކަމަށެވެ. އެ މުވައްޒަފުން ސަސްޕެންޑުކޮށްފައިވާ ކަމަށް ވެސް އެ ކުންފުނިން އޭރު ބުންޏެވެ.
